اسلام آباد : وزارت مذہبی امور نے کہا ہے کہ اب تک ایک لاکھ 29 ہزار پاکستانی عازمین حج سعودی عرب پہنچ چکے ہیں، سرکاری حج اسکیم کے تحت مکہ پہنچنے والےعازمین کی تعداد81ہزارہوگئی۔
تفصیلات کے مطابق پاکستان سے فریضہ حج کی ادائیگی کیلئے عازمین حج کی روانگی کا سلسلہ جاری ہے، اس حوالے سے ترجمان وزارت مذہبی امور کا کہنا ہے کہ اب تک ایک لاکھ 29 ہزار پاکستانی عازمین حج سعودی عرب پہنچ چکے ہیں،93ہزار سرکاری اور36 ہزار عازمین نجی حج اسکیم کے ذریعے سعودی عرب پہنچے۔
ترجمان کا مزید کہنا ہے کہ سرکاری حج اسکیم کے47 ہزار عازمین مدینہ کی زیارت مکمل کرکے مکہ پہنچ گئے ہیں جبکہ سرکاری حج اسکیم کے 12 ہزار عازمین حج ابھی مدینہ منورہ میں مقیم ہیں۔
سرکاری حج اسکیم کے تحت مکہ پہنچنے والےعازمین کی تعداد81ہزارہوگئی ہے، مذہبی امور کی ٹیمیں نجی حج کمپنیز کی مانیٹرنگ کررہی ہیں۔
علاوہ ازیں پشاور سے جدہ جانے والی نجی ایئرلائن کی پرواز کئی گھنٹے تاخیر کا شکار ہوگئی، پرواز پی اے670 طیارہ نہ ہونے پر جدہ روانہ نہیں ہوسکی۔
اس حوالے سے ایئرپورٹ ذرائع کا کہنا ہے کہ پرواز کو عازمین حج کو لے کر جدہ جانا تھا، پرواز کی روانگی کی درست معلومات نہ ملنے پر مسافروں نے ایئرپورٹ پر احتجاج بھی کیا۔
کئی گھنٹے احتجاج کے بعد انتظامیہ کی جانب سے مسافروں کو مقامی ہوٹل منتقل کردیا گیا، تاخیر کا شکار پرواز اب کل صبح روانہ ہوگی۔
