ریاض: سعودی عرب کی حکومت نے بیرون ملک سے آنے والے عمرہ زائرین کو اپنے تیس روزہ ویزے کے دوران کسی بھی شہر میں جانے کی اجازت دے دی ہے۔
عرب میڈیا کے مطابق سعودی عرب کی حکومت کی جانب سے بیرون ملک سے آنے والے عمرہ زائرین کو تیس روزہ ویزے کے دوران کسی بھی شہر جانے کی اجازت دے دی تاہم اس ایک ماہ کی مدت میں سے پندرہ دن مکہ مکرمہ اور مدینہ منورہ میں گزارنا ہوں گے۔
وزارت حج اور عمرہ کے انڈر سیکریٹری عبدالعزیز نے بتایا کہ گزشتہ ایک ہفتے کے دوران میں دنیا بھر سے ایک ہزار سے زائد عمرہ زائرین کی آمد ہوتی ہے اور گزشتہ چار روز میں عمرے کے 25 ہزار ویزے جاری کیے گئے ہیں۔
عبدالعزیز وزان نے اس توقع کا اظہار کیا ہے کہ اس سال عازمین عمرہ کی تعداد پچاس لاکھ تک پہنچ جائے گی اور عمرہ سیزن شوال المکرم کے اختتام تک جاری رہے گا، رپورٹ کے مطابق گزشتہ سال کے دوران عمرہ زائرین کی تعداد ستر لاکھ سے زائد تھی۔
سعودی عرب کی فراہم کردہ سرکاری اعداد و شمار کے مطابق مناسک حج کی ادنیٰ کے بعد مدینہ منورہ میں آنے والے زائرین کی تعداد 770704 تک پہنچ گئی ہے۔
مدینہ میں حج کمیٹی کے یونٹ برائے میڈیا اور سوشل کمیونی کیشن نے بتایا ہے کہ اس وقت مدینہ منورہ میں مقیم زائرین کی تعداد ایک لاکھ 76 ہزار سے زائد ہے۔
