ریاض : سعودی عرب کے یوم تاسیس کے موقع پر وزارت انسانی وسائل و سماجی ترقی نے 22 فروری کو عام تعطیل کا اعلان کیا ہے۔
ذرائع ابلاغ کی رپورٹ کے مطابق سعودی عرب کا یوم تاسیس 22 فروری کو منایا جائے گا، جس کی خوشی میں سعودی حکومت نے سرکاری و نجی اداروں میں عام تعطیل کا اعلان کیا ہے۔
یومِ تاسیس، 1727 میں امام محمد بن سعود کے ہاتھوں پہلی سعودی ریاست کے قیام کی یاد میں منایا جاتا ہے۔
اس دن کا مقصد مملکت کی شاندار تاریخ، قومی وحدت، اور حکمرانوں اور عوام کے درمیان مضبوط رشتے کو خراج تحسین پیش کرنا ہے۔
اس موقع پر مملکت کے تمام شہروں میں فنونِ لطیفہ اور ثقافتی سرگرمیاں اور تقریبات منعقد کی جائیں گی، جو عوام کے تاریخی ورثے پر فخر اور ان کی ثابت قدمی کی عکاسی کریں گی۔ یہ تقریبات مملکت کے ترقیاتی سفر، اس کی خوشحالی اور مشکلات کے ادوار کو اجاگر کریں گی۔
یہ موقع قومی تشخص اور اتحاد کے ان ابدی اصولوں کو بھی اجاگر کرے گا، جو ابتدا سے لے کر آج تک سعودی عرب کی تاریخ کے ہر دور میں برقرار رہے ہیں۔
خیال رہے کہ سعودی عرب میں ہفتہ وار تعطیل جمعہ اور سنیچر کو ہوتی ہے۔ امسال یوم تاسیس سنیچر22 فروری کو ہوگا۔ سنیچر کو ہفتہ وار تعطیل کی وجہ سے یوم تاسیس کی چھٹی بعض اداروں میں جمعرات جبکہ بعض میں اتوار کو ہوگی۔
مزید پڑھیں : عمرے کی آڑ میں بھیک مانگنے کے غرض سے سعودی عرب جانیوالے 11 مسافر گرفتار
ایف آئی اے امیگریشن نے کراچی ایئرپورٹ پر کارروائی کرتے ہوئے عمرے کی آڑ میں بھیک مانگنے کے غرض سے سعودی عرب جانے والے 11 مسافروں کو گرفتار کرلیا۔
ایف آئی اے نے بتایا کہ 8 خواتین سمیت 11 مسافروں کو آف لوڈ کر دیا گیا ہے، ملزمان عمرے ویزے پر سعودی عرب جا رہے تھے، ملزمان کی جانب سے پیش کیے جانے والے ریٹرن ٹکٹ اور ہوٹل بکنگ بھی جعلی نکلے۔
ملازمت کی غرض سے عمرہ ویزہ پر سعودی عرب جانے والے ہوشیار ہوجائیں!
