ویانا: سعودی عرب نے عالمی سطح پر ایک اور سنگ میل طے کرتے ہوئے عالمی توانائی جوہری ایجنسی (آئی اے ای اے) کے گورننگ باڈی کی رکنیت حاصل کرنے میں کامیابی حاصل کی ہے۔
تفصیلات کے مطابق آسٹریا کے شہر ویانا میں منعقدہ جوہری توانائی ایجنسی کے اجلاس کے موقع پرتنظیم کی گورننگ باڈی کا اجلاس ہوا جس میں سعودی عرب نے بھی شرکت کی۔
عرب میڈیا کے مطابق آئی اے ای اے کے 63 ویں اجلاس کے موقع پر سعودی عرب کو 2019ءتا 2021ءتک رکنیت دی گئی۔ شاہ عبداللہ سٹی برائے جوہری اور قابل تجدید توانائی کے صدر ڈاکٹر خالد بن صالح السلطان کی قیادت میں سعودی عرب کا وفد 17 سے 21 محرم تک جاری رہنے والے اجلاس میں شرکت کررہا ہے۔
ڈاکٹر السلطان نے وضاحت کی کہ بین الاقوامی جوہری توانائی ایجنسی کے بورڈ آف گورنرز میں مملکت کی شمولیت فتح ہے۔ سعودی عرب کو ایجنسی میں یہ مقام ملنا مملکت پراعتماد اور عالمی فورمز پر اس کے کردار کا اعتراف ہے۔
مشرق وسطیٰ میں امریکی اتحاد کے قیام پر ایران کی تنقید
انہوں نے زور دے کر کہا کہ بورڈ آف گورنرز میں سعودی عرب کی نمائندگی ایک اہم اقدام ہے جو مملکت میں بین الاقوامی اعتماد کی عکاسی کرتا ہے اور مملکت کے قومی جوہری توانائی پروجیکٹ کو اہمیت دینے کے مترادف ہے۔
انہوں نے سعودی عرب کے وزیر توانائی شہزادہ عبدالعزیز بن سلمان کی طرف سے مملکت کو عالمی جوہری توانائی ایجنسی کی رکنیت دلوانے میں بھرپور کوششیں کرنے پران کا خصوصی شکریہ ادا کیا۔
