ریاض: سعودی عرب نے کوروناویکسین کی دونوں خوراک نہ لینے والے مسافروں پر سفری پابندی عائد کردی۔
عرب میڈیا کی رپورٹ کے مطابق وہ مسافر جو مملکت سے بیرون ملک سفر کرنا چاہتے ہیں لیکن ویکسین کی دونوں ڈوز نہیں لگوائیں تو ان پر 9 اگست سے سفری پابندی ہوگی۔
رپورٹ میں بتایا گیا ہے کہ سعودی عرب نے 9اگست سے بیرون ملک سفر پر روانہ ہونے کے خواہاں اپنے تمام شہریوں پرکووِڈ-19 کی ویکسین کی دونوں خوراکیں لگوانے کی شرط رکھ دی ہے۔ وزارت داخلہ نے اپنے اعلامیہ میں کہا ہے کہ سفر کے خواہش مند مسافر نواگست سے پہلے مکمل ویکسینیشن کرالیں۔
اعلامیہ کے مطابق اس پابندی کا 12 سال سے کم عمر بچوں پر اطلاق نہیں ہوگا مگر اس کی یہ شرط ہوگی کہ ان کی سفری انشورنش پالیسی میں کوروناوائرس سے متعلق تمام اخراجات شامل ہوں۔
اسی طرح گزشہ چھے ماہ کے دوران وبا کے شکار ہوکر صحت یاب ہونے والے بھی اس پابندی سے مستثنیٰ ہوں گے، کورونا کو شکست دے کر ویکسین کی پہلی خوراک لینے والوں کو سفر کی اجازت دی جائے گی۔
سعودی وزارت داخلہ کا کہنا ہے کہ کوروناوائرس مختلف اقسام کے ساتھ پھیل رہا ہے ایسی صورت میں وبا سے ہرممکن بچاؤ بہت ضروری ہے، نیا فیصلہ اسی سلسلے کی ایک کڑی ہے۔