سعودی عرب نے غزہ میں بڑھتی ہوئی کشیدگی کو مد نظر رکھتے ہوئے اہم فیصلہ کرلیا، کیونکہ اسرائیل فلسطین صورتحال خطے کے امن کیلیے خطرے کا باعث بن رہی ہے۔
بین الاقوامی ذرائع ابلاغ کے مطابق سعودی عرب نے اسلامی تعاون تنظیم کے وزرائے خارجہ کاہنگامی اجلاس طلب کرلیا، اسلامی تعاون تنظیم کے وزرائے خارجہ کے ہنگامی اجلاس میں غزہ میں بڑھتی کشیدگی پرتبادلہ خیال کیا جائیگا جبکہ اوآئی سی وزرائے خارجہ غزہ میں بڑھتی کشیدگی کا جائزہ لیں گے۔
اوآئی سی جنرل سیکریٹریٹ کی جانب سے غزہ میں اسرائیلی فوج کی جارحیت کی ایک بار پھر مذمت کی گئی ہے، اوآئی سی کی جانب سے اسرائیل کو اقوام متحدہ قراردادوں کو نظر انداز کرنے کا ذمہ دار ٹھہرایا گیا ہے۔
دوسری جانب خادم حرمین شریفین شاہ سلمان بن عبدالعزیز کی زیرِ صدارت سعودی کا بینہ کا اجلاس ہوا جس میں عالمی رابطوں کے ذریعے غزہ میں کشیدگی روکنے کے عزم کا اعادہ کیا گیا۔
اجلاس کے جاری کردہ اعلامیے میں کہا گیا کہ سعودی عرب جدوجہد میں مسلسل فلسطینی عوام کے ساتھ ہے، غزہ اور گرد و نواح میں لڑائی بند کرنا ضروری ہے۔
اعلامیے کے مطابق اجلاس میں ہمسایہ ملکوں کے ساتھ تعلقات مضبوط بنانے سے متعلق سفارتی رابطوں پر گفتگو ہوئی جبکہ کابینہ نے شاہ سلمان اور ولی عہد محمد بن سلمان کی جانب سے عالمی رہنما کے ساتھ گفتگو کا جائزہ لیا گیا۔
اجلاس میں فلسطینی صدر، اردن کے فرمانروا اور مصری صدر کے ساتھ رابطوں کا حوالہ دیا گیا۔ اعلامیے کے مطابق سعودی عرب نے تینوں ممالک کے ساتھ غزہ کی صورتحال پر گفتگو کی۔
اجلاس میں شہزادہ محمد بن سلمان نے کہا کہ سعودی عرب فلسطینی عوام کے جائز حقوق کے حصول میں ساتھ ہے۔
