ریاض : گاڑی گہرے گڑھے میں گاڑی گرنے سے تین خواتین کے زخمی ہونے کے واقعے پر بلدیہ حکام نے تین انجینئروں سمیت سپر وائزر کو معطل کردیا، مذکورہ افراد گڑھے کے گرد باڑ نہ لگانے کہ ذمہ دار قرار پائے۔
تفصیلات کے مطابق گزشتہ روز سعودی عرب کے شہر ریاض میں ایک ٹریفک حادثہ پیش آیا تھا جس میں ایک کار بے قابو ہوکر گہرے گڑھے میں گر گئی تھی، جس کے نتیجے میں کار میں موجود تین خواتین شدید زخمی ہو گئیں۔
سوشل میڈیا پر پوسٹ میں ایک صارف نے حادثے کی وجہ گڑھے کے گرد حفاظتی باڑ کا نہ ہونا بتایا جس کے جواب میں ریاض میونسپلٹی نے واقعے کی تحقیقات کرانے کی یقین دہانی کرائی تھی۔
اس حوالے سے تحقیقات کے بعد ریاض میونسپلٹی نے ٹھیکیدار کمپنی میں کام کرنے والے تین انجینئروں سمیت منصوبے کے سپر وائزر کو معطل کر دیا ہے۔
ریاض کے ایک علاقے میں بلدیہ کی جانب سے تعمیراتی کام جاری تھا جس کے لیے گڑھا کھودا گیا تھا، متعلقہ ٹھیکیدار اس امر کا پابند تھا کہ وہ کسی بھی نوعیت کا ترقیاتی کام شروع کرنے سے قبل احتیاطی تدابیر اختیار کرے جو اس نے نہیں کی اور یہ حادثہ رونما ہوا۔
میونسپلٹی حکام نے ٹھیکہ لینے والی کمپنی کو حادثے کے باعث ہونے والے نقصان اور زخمیوں کے علاج پر ہونے والے اخراجات ادا کرنے کا حکم دیا ہے، اس کے علاوہ راہگیروں کی جان خطرے میں ڈالنے پر جرمانہ بھی عائد کیا گیا ہے۔
مزید پڑھیں: سعودی خواتین کی کار کو خوفناک حادثہ
بلدیہ حکام کے مطابق ترقیاتی کام کا ٹھیکہ لینے والی کمپنی اس بات کی پابند تھی کہ وہ قواعد وضوابط پر عمل کرتے ہوئے گڑھے کے گرد حفاظتی باڑ لگا کر شہریوں کی آگاہی کیلئے بورڈ بھی نصب کرتی مگر اس نے ایسا کچھ نہیں کیا۔
