ریاض: سعودی عرب میں آج سے مردم شماری کا دوسرا مرحلہ شروع ہو رہا ہے۔
تفصیلات کے مطابق سعودی عرب میں منگل 10 مئی 2022 سے مردم شماری کے دوسرے مرحلے کا آغاز ہو رہا ہے جو 15 جون تک جاری رہے گا۔
سعودی عرب میں مردم شماری کے سلسلے میں تین طریقے استعمال کیے جائیں گے، پہلا طریقہ یہ ہے کہ افراد اور خاندان خود سے متعلق مطلوبہ معلومات شہروں میں موجود شاپنگ سینٹرز میں قائم کاؤنٹرز پر وزٹ کر کے درج کرائیں۔
دوسرا طریقہ یہ ہے کہ مردم شماری سے متعلق ای گیٹ پر جا کر معلومات کا اندراج کرایا جائے، مشترکہ قومی پلیٹ فارم یا محکمہ شماریات کے ای گیٹ تک رسائی کے لیے مکانات پر چسپاں نمبر استعمال کیا جائے گا۔
تیسرا طریقہ یہ ہے کہ مردم شماری کے لیے تعینات اہل کاروں کا انتظار کیا جائے اور ان کے تعاون سے مردم و مکان شماری فارم پُر کرایا جائے، اس کے لیے قومی شناختی کارڈ یا خاندان کا تعارفی ریکارڈ یا اقامہ طلب کیا جائے گا۔
واضح رہے کہ سعودی شہریوں، مقیم غیر ملکیوں اور مکانات کی تعداد شمار کرنے کا مقصد سرکاری اور پرائیویٹ سیکٹر کے فیصلہ سازوں کو مختلف پروگراموں اور اسکیموں کی تیاری میں مدد دینا ہے۔
مردم شماری مہم کے تحت 50 سوالات کیے جائیں گے، ان میں رہائش کی نوعیت، ملکیت یا کرایے، کمروں کی تعداد، صحت، تعلیمی معیار، کتنی اور کونسی زبانیں جانتے ہیں، آمدنی کیا ہے؟ مکان میں رہنے والے افراد کی تعداد وغیرہ دریافت کی جائے گی۔
علاوہ ازیں سعودی محکمہ شماریات نے کہا ہے کہ مردم شماری 2022 میں ہر شہری اور مقیم غیر ملکی کے کوائف صیغہ راز میں رکھے جائیں گے، شماریات کے قانون کے مطابق کسی بھی فرد سے حاصل شدہ معلومات کسی بھی شکل میں غیر متعلقہ فرد یا ادارے کو نہیں دی جا سکتیں۔
