ریاض: سعودی عرب میں تعینات چینی سفیر نے اپنی اہلیہ کے ساتھ العلا کے تاریخی مقام کی سیر کی، انہوں نے کہا کہ العلا نہ صرف مقامی بلکہ غیر ملکی سیاحوں کے لیے بھی غیر معمولی دلچسپی کا حامل ہے۔
سعودی ویب سائٹ کے مطابق سعودی عرب میں متعین چین کے سفیر چن وی چنگ نے اپنی اہلیہ کے ہمراہ العلا کے تاریخی مقام کی سیر کی۔
اس موقع پر انہوں نے خصوصی طور پر جبل الفیل (ہاتھی والی پہاڑی) کے پاس تصویر بنوانے کے بعد اسے اپنے ٹویٹر اکاؤنٹ پر اپ لوڈ کرتے ہوئے چین میں اس پہاڑی سے مشابہ ایک اور تصویر شیئر کرتے ہوئے دونوں میں یکسانیت کی جانب توجہ دلائی۔
چینی سفیر نے اپنے ٹویٹ میں لکھا کہ العلا نہ صرف مقامی بلکہ غیر ملکی سیاحوں کے لیے بھی غیر معمولی دلچسپی کا حامل ہے۔
العلا میں قدیم تہذیب و ثقافت کے آثار آج بھی موجود ہیں جنہیں لوگ دلچسپی سے دیکھنے آتے ہیں۔ چینی سفیر نے گذشتہ دنوں اپنی اہلیہ کے ہمراہ العلا کی سیر کے موقع پر ہاتھی والی پہاڑی کی تصویر کے ساتھ جو دوسری تصویر شیئر کی وہ چین میں ایک آبی پہاڑی کی ہے جو العلا کی پہاڑی سے مشابہت رکھتی ہے۔
دونوں پہاڑیاں قدرتی طور پر ایسے کٹاؤ کی حامل ہیں کہ انہیں دیکھنے میں یہی گمان ہوتا ہے کہ دیو قامت ہاتھی کھڑا ہے۔
چین کے شہر گویلین میں ہاتھی والی پہاڑی ایک آبی گزر گاہ کے ساتھ واقع ہے جسے دیکھ کر بھی دیو قامت ہاتھی کا گمان ہوتا ہے، العلا کمشنری سے 7 کلو میٹر صحرا میں یہ قدرتی شاہکار بھی ہاتھی کی شبیہ دیتا ہے۔
