لندن : سعودی عرب کی جانب سے کورونا وائرس سے نمٹنے کے لیے برطانیہ کو ہزاروں حفاظتی طبی لباس فراہم کرنے پر برطانوی حکومت نے سعودی حکومت کا شکریہ ادا کیا ہے۔
تفصیلات کے مطابق برطانوی وزیرخارجہ ڈومینک راب نے ہزاروں حفاظتی میڈیکل لباس کے تحفے پر سعودی عرب کا شکریہ ادا کیا ہے۔
یہ بات برطانوی وزیرخارجہ نے سماجی رابطے کی ویب سائٹ ٹوئٹر پراپنے پیغام میں کہی، انہوں نے کہا کہ نئے کورونا وائرس سے نمٹنے کے لیے برطانیہ کو ہزاروں میڈیکل گاؤنز کے فیاضانہ تحفے پر سعودی عرب کے بے حد شکر گزار ہیں۔
Very grateful to Saudi Arabia🇸🇦 for the generous donation of hundreds of thousands of medical gowns to our NHS. 🇬🇧 and 🇸🇦 will continue to work together to tackle this global pandemic. @KSRelief_EN
— Dominic Raab (@DominicRaab) June 14, 2020
ان کا کہنا تھا کہا کہ سعودی عرب اور برطانیہ اس عالمی وبا سے نمٹنے کے لیے مشترکہ جدوجہد جاری رکھیں گے، انہوں نے کورونا کی وبا سے نمٹنے کے لیے طبی امداد پر سعودی عرب کے لیے انتہائی ممنونیت کا اظہار کیا۔
اس سے قبل برطانوی جریدے ڈیلی ٹیلی گراف نے سرکاری ڈاکٹروں کے حوالے سے رپورٹ میں کہا تھا کہ برطانیہ میں نئے کورونا وائرس کے 20 فیصد مریض اسپتالوں میں وائرس سے متاثر ہوئے ہیں۔
رپورٹ میں یہ بھی بتایا گیا تھا کہ سائنسدانوں کو یقین ہے کہ کووڈ 19 کے پھیلنے کا 22 فیصد تک سبب اسپتالوں میں موجود وائرس ہے اور گیارہ فیصد اموات اسی کی وجہ سے ہوئی ہیں۔
برطانوی وزیرخزانہ نے اپنے بیان میں مزید کہا ہے کہ حکومت برطانیہ پہنچنے والے سیاحوں کو دو ہفتے تک قرنطینہ میں رکھنے کی پابندی لگانے پر غور کررہی ہے۔ اس حوالے سے دیگر ضوابط میں بھی تبدیلی کی جاسکتی ہے۔
یاد رہے کہ برطانیہ میں نئے کورونا وائرس کوویڈ 19 کے متاثرین کی تعداد دو لاکھ 97 ہزار 342 ہے جبکہ مرنے والوں کی تعداد 41 ہزار 783تک پہنچ چکی ہے۔
