ریاض: سعودی عرب میں کرونا وائرس کے مریضوں کی شرح کم اور ان کی صحتیابی کی شرح بڑھتی جارہی ہے، سعودی حکومت وائرس کی روک تھام کے لیے 4 نکاتی پروگرام پر عمل پیرا ہے جو نہایت مؤثر ثابت ہو رہا ہے۔
سعودی ویب سائٹ کے مطابق سعودی وزارت صحت کے ترجمان ڈاکٹر محمد العبد العالی کا کہنا ہے کہ کرونا وائرس کو پھیلنے سے روکنے اور لوگوں کو اس سے بچانے کے لیے کیے جانے والے حفاظتی اقدامات نے سعودی عرب کو منفرد ممالک کی صف میں شامل کردیا ہے۔
ان کے مطابق مملکت نے فوری حفاظتی اقدامات کر کے کرونا وائرس کو اپنے یہاں بڑے پیمانے پر پھیلنے سے روک دیا ہے، مملکت میں کرونا وائرس سے متاثرین کا تناسب آبادی کے حوالے سے کافی کم ہے۔
العبد العالی نے پریس کانفرنس میں مزید بتایا کہ مملکت میں کئی دن سے کرونا کے مریضوں کی تعداد بڑھی ہے لیکن یہ اضافہ تدریجی ہے۔
انہوں نے کہا کہ سعودی عرب نے کرونا وائرس سے نمٹنے کے لیے دواؤں کا جو پروٹوکول تیار کیا ہے اسے سعودی اور بین الاقوامی صحت ماہرین کی نگرانی میں 4 مرتبہ تبدیل کیا گیا ہے۔
ترجمان کا کہنا تھا کہ کرونا وائرس سے نمٹنے کے لیے دواؤں کا پروٹوکول مؤثر ثابت ہوا ہے، کل متاثرین میں سے 47 فیصد صحتیاب ہوگئے ہیں۔
انہوں نے کہا کہ کرونا وائرس سے نمٹنے کے لیے سعودی عرب 4 نکاتی پروگرام پر عمل پیرا ہے، وائرس سے بچاؤ اور سوشل آئسولیشن، لیبارٹری ٹیسٹ، وبا کو پھیلنے سے روکنا اور متاثرین کا علاج۔
وزارت صحت کے ترجمان نے مزید کہا کہ 4 نکاتی صحت پروگرام کی بدولت سعودی عرب میں وائرس قابو میں ہے اور متاثرین کا گراف کم کرنے میں مدد مل رہی ہے۔
0
20
