ریاض: سعودی شوریٰ کونسل نے مملکت کو بائیک فرینڈلی بنانے کی تجویز منظور کرلی، تجویز میں کہا گیا تھا کہ سائیکل چلانے کے بے شمار معاشی، سماجی و طبی فوائد ثابت شدہ ہیں۔
بین الاقوامی میڈیا کے مطابق سعودی شوریٰ کونسل میں یہ تجویز ڈاکٹر طارق فدک کی جانب سے پیش کی گئی جس کی حمایت میں کونسل کے اکثریتی ارکان نے ووٹ دیا۔
ڈاکٹر طارق کا کہنا تھا کہ شہری ترقی کے ساتھ ساتھ ہمیں آمد و رفت کے جدید ذرائع چاہئیں تاہم ایسے میں سائیکل نے اپنی افادیت ثابت کی ہے۔
انہوں نے کہا کہ بائیسیکل انفراسٹرکچر پر سرمایہ کاری ایک دانشمندانہ اقدام ہوگا۔ بے شمار تحقیقات میں شہروں میں سائیکل چلانے کے سماجی، معاشی، ماحولیاتی اور طبی فوائد ثابت ہوچکے ہیں۔
ڈاکٹر طارق کا کہنا تھا کہ مملکت میں تمام سڑکوں پر پیدل چلنے والوں اور سائیکل چلانے والوں کے لیے الگ لینز مختص کرنا ضروری ہے۔
سعودی اسپورٹس فیڈریشن کے مطابق سعودی عرب میں پیدل چلنا شہریوں کا اولین مشغلہ ہے، اس کے بعد دوسرے نمبر پر سائیکلنگ کی مصروفیت آتی ہے۔
ڈنمارک میں کی جانے والی ایک تحقیق کے مطابق سائیکل چلائے جانے کے ہر کلومیٹر پر ملکی معیشت کو براہ راست فائدہ پہنچتا ہے جبکہ کار چلائے جانے پر ہر کلومیٹر پر توانائی کے ذرائع خرچ ہونے اور آلودگی میں اضافے کی مد میں معیشت کو نقصان پہنچتا ہے۔
