کراچی: سعودی عرب نے پاکستان سمیت دنیا بھر سے اپنے ڈاکٹرز اور پیرا میڈیکل اسٹاف کی واپسی کا بڑا فیصلہ کر لیا ہے۔
تفصیلات کے مطابق جنرل اتھارٹی آف سول ایوی ایشن (GACA) نے اہم قدم اٹھاتے ہوئے ڈاکٹروں اور پیرا میڈیکل عملے کی واپسی کا فیصلہ کر لیا، پاکستان سمیت دنیا بھر سے طبی عملہ واپس بلایا جائے گا۔
اس سلسلے میں بتایا گیا ہے کہ اقامہ ہولڈرز اور درست ویزے کے حامل ڈاکٹرز اور طبی عملے کو سعودی عرب داخلے کی اجازت ہوگی۔ لاک ڈاؤن کے باعث جو طبی عملہ بیرون ملک پھنس گیا تھا اسے سعودی عرب واپس لانے کے لیے ہدایات جاری کر دی گئیں۔
سعودی سول ایوی ایشن اتھارٹی نے طبی عملے کو واپس لانے کے انتظامات شروع کر دیے، گاکا نے اس سلسلے میں دیگر فضائی کمپنیوں کو بھی طبی عملے کو لانے کے لیے ٹریول ایڈوائزری جاری کر دی۔
سعودی عرب میں پھنسے مزید پاکستانیوں کی وطن واپسی
گاکا نے کہا ہے کہ جو ڈاکٹرز، نرسز اور دیگر طبی عملہ سعودی عرب واپس آنا چاہتا ہے اسے ترجیحی بنیادوں پر لایا جائے گا۔
واضح رہے کہ سعودی عرب میں پھنسے ہوئے پاکستانیوں کی وطن واپسی کا سلسلہ بھی جاری ہے، گزشتہ روز پی آئی اے نے ریاض اور دمام سے پاکستان کے لیے خصوصی پروازیں آپریٹ کی تھیں، پی آئی اے کے اسٹیشن مینجر ریاض کا کہنا تھا کہ خصوصی پروازوں کے ذریعے 4 ہزار800 سے زائد ہم وطنوں کو پاکستان پہنچایا گیا، دمام سے 2 ہزار 400 سے زائد ہم وطنوں کو ان کی منزل مقصود تک پہنچا دیا گیا ہے۔
