ریاض: سعودی عرب میں ٹریفک پولیس کی جانب سے جاری ہدایات میں کہا گیا ہے کہ دوسروں کی گاڑی عارضی اتھارٹی لیٹر کے بغیر نہ چلائی جائے۔
تفصیلات کے مطابق سعودی عرب میں دوسروں کی گاڑی عارضی لیٹر کے بغیر چلانے اور خلاف ورزی ریکارڈ ہونے کی صورت میں چالان گاڑی کے مالک کو بھرنا پڑے گا۔
سعودی عرب میں ڈیجیٹل چالان سسٹم نافذ ہے جس کے تحت ٹریفک کی خلاف ورزی پر کیا جانے والا چالان براہ راست گاڑی کے مالک کے نام کاٹا جاتا ہے، چالان ہونے کی صورت میں گاڑی کے مالک کو چالان کی رقم ادا کرنا ہوگی۔
ٹریفک پولیس کے مطابق گاڑی چلانے کے لیے جاری کیے جانے والے اتھارٹی لیٹر میں ڈرائیور کے کوائف درج کیے جاتے ہیں، خلاف ورزی پر چالان اسی پر ہوگا جس کے کوائف اتھارٹی لیٹر میں درج کیے گئے ہوں گے۔
ٹریفک پولیس کی جانب سے ابشر ڈیجیٹل سسٹم کے ذریعے گاڑی چلانے کے لیے عارضی یا مستقل بنیادوں پر اتھارٹی لیٹر جاری کرانے کی سہولت فراہم کی گئی ہے۔
محکمہ ٹریفک کی جانب سے جاری ہدایات میں کہا گیا ہے کہ غیر ملکی ڈیجیٹل طریقے سے عارضی اتھارٹی لیٹر جاری کرانے کے اہل ہیں جن کے ایک کفیل ایک ہی ہوں۔
ٹریفک پولیس کے مطابق وہ سعودی جنہوں نے ڈرائیور رکھے ہیں وہ بھی اپنے ڈرائیوروں کے نام پر اتھارٹی لیٹر جاری کراسکتے ہیں۔
