ریاض : سعودی عرب کے نوجوان رازق رزق اللہ الحسنانی نے اتفاقیہ طور پر عقابوں کی نیلامی میں اپنا عقاب فروخت کرکے تین لاکھ 61ہزار ریال کما لیے ہیں۔
عودی ذرائع ابلاغ کے مطابق 35 سالہ نوجوان نے کہا ہے کہ میں نے عقابوں کو شکار کرکے فروخت کرنے کا ہنر اپنے بھائی عبدالرازق کے ساتھ والد سے سیکھا جب میری عمر صرف 6 سال تھی۔
نوجوان نے بتایا کہ میں نے اب تک کئی عقاب شکار کرکے فروخت کیے مگر کوئی بھی مہنگا ترین عقاب 5 ہزار ریال سے زیادہ نہیں تھا۔ سنیچر کے دن نیلامی میں اپنا نیا عقاب فروخت کے لیے پیش کیا تو آدھے گھنٹے کی بولی کے بعد اسے تین لاکھ 61 ہزار ریال میں فروخت کر دیا گیا۔
یہ عقاب المجیرمہ نامی علاقے سے شکار کیا گیا تھا، اب دوبارہ اسی علاقے میں کسی دوسرے قیمتی عقاب کو شکار کرنے کی کوشش کروں گا۔
رازق رزق اللہ الحسنانی کا کہنا تھا کہ جو عقاب فروخت کیا گیا وہ شاہین نوعیت کا تھا، اس کی لمبائی 15 انچ، چوڑائی 16 انچ اور وزن 1100 گرام تھا۔ اس قیمتی عقاب کو صالح المطیری نامی شخص نے خریدا ہے۔
