ریاض: سعودی عرب میں عید الفطر کی تعطیلات کے باعث فضائی سفر کے ٹکٹس مہنگے ہونے کے بعد قیمتوں میں کمی کے لیے اقدامات کیے جارہے ہیں۔
سعودی ویب سائٹ کے مطابق سعودی عرب میں محکمہ شہری ہوا بازی نے داخلی پروازوں کے ٹکٹوں کی قیمتوں میں اضافے کا نوٹس لیتے ہوئے اقدامات کا اعلان کیا ہے۔
محکمہ شہری ہوا بازی کا کہنا ہے کہ یہ بات مشاہدے میں آئی ہے کہ داخلی پروازوں کے بعض زمروں کے ٹکٹ کی قیمتیں بڑھ گئی ہیں، صورتحال پر کنٹرول کے لیے کئی اقدامات کیے جارہے ہیں۔
محکمے کے مطابق ان میں سے اہم یہ ہے کہ پروازوں اور نشستوں کی تعداد میں اضافہ کروایا جارہا ہے، ان اقدامات کا نتیجہ ٹکٹوں کی قیمتوں میں کمی کی صورت میں نکلے گا۔
محکمہ شہری ہوا بازی نے داخلی پروازوں کے لیے ٹکٹوں کے مناسب نرخ اور نشستوں کی تعداد میں ممکنہ حد تک توسیع کے لیے ضروری اقدامات کیے ہیں۔
محکمہ شہری ہوا بازی کا کہنا ہے کہ مسافروں کے حقوق اور ان کا تحفظ اولین ترجیح ہے، اس کا پورا خیال رکھا جائے گا۔
فضائی کمپنیوں اور بکنگ ویب سائٹس کے اعداد و شمار کے مطابق اپریل کے وسط تک فضائی ٹکٹوں کے نرخ مستحکم تھے، اپریل کے آخری ہفتے اور مئی کے پہلے ہفتے کے لیے بکنگ مشکل ہوگئی ہے، اس دوران ٹکٹ مہنگے ہوئے ہیں۔
