ریاض: سعودی عرب میں ایک شخص نے جوازات کے ٹوئٹر پر دریافت کیا کہ ان کے پاسپورٹ کی ایکسپائری میں 25 دن باقی ہیں تو کیا خروج نہائی لگ سکتا ہے؟
مذکورہ شخص نے کہا کہ میں اب مستقل طور پر پاکستان جانا چاہتا ہوں، پاسپورٹ کی تجدید کراتا ہوں تو اس میں کم از کم دو ہفتے لگیں گے جب کہ اقامہ کی مدت بھی ختم ہونے کے قریب ہو جائے گی، کفیل کا کہنا ہے کہ پاسپورٹ کی مدت کم ہونے کی وجہ سے خروج نہائی نہیں لگایا جا سکتا۔
سوال کے جواب میں جوازات کا کہنا تھا کہ وہ تارکین جو خروج نہائی پر جاتے ہیں، امیگریشن قانون کے مطابق ان کے پاسپورٹ کی ایکسپائری کم از کم 60 دن ہونا ضروری ہے۔
جوازات نے کہا اگر پاسپورٹ کی ایکسپائری میں 25 دن باقی ہیں تو اس حوالے سے کفیل کا کہنا درست ہے، اس صورت میں خروج نہائی ویزا نہیں لگایا جا سکتا۔
جوازات کے مطابق اس صورت میں لازمی ہے کہ یا تو پاسپورٹ کی تجدید کی جائے یا اس کی ایکسپائری میں عارضی طور پر اضافہ کر کے اس کا اندراج محکمہ امیگریشن اینڈ پاسپورٹ کے سسٹم میں درج کرایا جائے، سفارت خانے یا قونصلیٹ سے عارضی اضافے کی صورت میں وقت کا مسئلہ ختم ہو جائے گا جس کے بعد خروج نہائی لگایا جا سکتا ہے۔
واضح رہے کہ خروج نہائی لگائے جانے کے بعد اقامہ ہولڈر کے پاس 60 دن کی مہلت ہوتی ہے، اس دوران ان کا مملکت میں قیام قانونی شمار ہوتا ہے۔
