ریاض : سعودی حکومت نے بھارت سے پروازوں کا سلسلہ تاحال بند رکھا ہوا ہے، السعودیہ انتظامیہ کا کہنا ہے کہ بین الاقوامی پروازیں کھولنے کا باقاعدہ اعلان جنوری میں کیا جائے گا۔
تفصیلات کے مطابق سعودی عربین ائیر لائن السعودیہ نے مؤثر خروج عودہ ( ایگزٹ ری انٹری) رکھنے والوں کی انڈیا سے سعودی عرب واپسی کے حوالے سے استفسار کا جواب دیا ہے۔
عاجل ویب کے مطابق انڈین شہری نے دریافت کیا تھا کہ مؤثر خروج و عودہ رکھنے والوں کے لیے انڈیا سے سعودی عرب کے لیے پروازیں کب شروع ہوں گی۔
السعودیہ نے ٹوئٹر کے سرکاری اکاؤنٹ پر اس کا جواب دیتے ہوئے کہا کہ فی الوقت انڈیا سے سعودی عرب کے لیے تمام پروازیں معطل ہیں۔ جب بھی بحالی کا فیصلہ ہوگا اس کا باقاعدہ اعلان کیا جائے گا۔
السعودیہ نے یاد دہانی کرائی کہ قیادت کی ہدایت کی مطابق یکم جنوری سے بین الااقوامی پروازیں بحال ہوجائیں گی تاہم متعلقہ ادارے اس بات کی توثیق یکم دسمبر کو کریں گے۔
ترجمان السعودیہ کے بیان میں مزید کہا گیا ہے کہ مستثنی زمروں کے لیے السعودیہ کی پروازیں پندرہ ستمبر سے چل رہی ہیں۔