سعودی عرب میں محکمہ موسمیات کی جانب سے مکہ مکرمہ اور مدینہ ریجنوں کے متعدد شہروں کے لیے غیر یقینی موسم کے باعث ریڈ الرٹ جاری کردیا گیا ہے۔
سعودی خبر رساں ادارے کی رپورٹ کے مطابق محکمے کی جانب سے دیگر ریجنوں کے شہروں کے لیے بھی ریڈ الرٹ جاری کیا گیا ہے۔
محکمہ موسمیات نے مکہ مکرمہ ریجن کے حوالے کہا ہے کہ ’طائف، الخرمہ، المویہ، تربہ، رنیہ اور میسان میں موسم غیر یقینی رہے گا۔ موسلادھار بارش، گرج چمک اور تیز ہوا چلے گی جس کے باعث حد نگاہ متاثر ہوسکتی ہے۔
مدینہ منورہ ریجن کے الحناکیہ اور المہد شہروں میں بھی یہی کیفیت رہنے کا امکان ہے۔
محکمے کے مطابق ریاض شہر کے علاوہ الخرج، الدلم، المزاحمیہ، شقرا اور الدوادمی کے علاوہ دیگر شہروں میں درمیانے درجے کی بارش کا امکان ہے جبکہ تیز ہوا کے باعث حد نگاہ متاثر ہوگی۔
محکمے نے عسیر، جازان، الجوف، قصیم، مشرقی ریجن، حائل اور نجران کے لیے انتباہ جاری کیا ہے جہاں درمیانے درجے کی بارش کے ساتھ تیز ہوا کا امکان ہے۔
واضح رہے کہ اس سے قبل سعودی عرب میں آنے والے گرد و غبار کے طوفان کے باعث محکمہ تعلیم ریجن کے تمام سکولوں میں تدریسی عمل متاثر ہو گیا تھا، طلبہ اور اساتذہ کی سلامتی کے لیے تدریسی عمل آن لائن انجام دیا گیا تھا۔
سعودی عرب: ریاض سے 2 افراد سنگین جرم میں گرفتار
محکمہ شہری دفاع نے تمام رہائشیوں کو گھروں تک محدود رہنے کی ہدایت کرتے ہوئے بلا ضرورت گاڑی پر سفر کرنے سے منع کیا تھا۔
