The news is by your side.

Advertisement

سعودی عرب : ہائی وے پر ڈرائیونگ کرنے والوں کو ٹریفک پولیس کی سخت وارننگ

ریاض : سعودی ٹریفک پولیس نے ہائی ویز پر گاڑی چلانے والے شہریوں کو خصوصی ہدایات جاری کرتے ہوئے متنبہ کیا ہے کہ قوانین کی خلاف ورزی نہ کی جائے بصورت دیگر چالان ازخود ہوجائے گا۔

سعودی ذرائع ابلاغ کا کہنا ہے کہ اس حوالے سے ہائی وے پولیس نے گاڑیوں کی نمبر پلیٹوں کو چھپانے یا ان میں کسی قسم کی تبدیلی کرنے کو قانونی خلاف ورزی قرار دیا ہے جس پر سسٹم کے ذریعے خودکار طریقے سے چالان کیا جائے گا۔

ذرائع کے مطابق ہائی وے پولیس کی جانب سے جاری کی جانے والی ہدایات کے حوالے سے کہا گیا ہے کہ 20 دسمبر سے گاڑیوں کی نمبر پلیٹوں میں تبدیلی کرنے یا انہیں چھپانے پر چالان کا خودکار سسٹم شروع کردیا جائے گا۔

واضح رہے زیادہ تر ہائی ویز پرسفر کرنے والے تیزرفتاری یا دیگر قانون شکنی سے بچنے کے لیے اپنی گاڑیوں کی نمبر پلیٹوں کو چھپانے کے لیے مختلف طریقہ استعمال کرتے ہیں تاکہ خودکارچالان سے بچ سکیں۔

محکمہ ٹریفک کے قانون کے تحت گاڑی کی نمبر پلیٹوں میں کی جانے والی تبدیلی قانونی طورپر جرم ہے ایسا کرنے والوں کے خلاف فوری کارروائی کی جاتی ہے۔

ہائی ویز پر نصب خود کار طریقے سے تیز رفتار کا چالان کرنے والے ریڈار ساھر سسٹم سے بچنے کے بعض پیشہ ورڈرائیور ہائی وے پر نکلتے ہی اپنی گاڑیوں کی نمبر پلیٹوں پر ٹیپ لگا کر ان کے نمبر چھپا دیتے ہیں تاکہ چالان نہ کیا جاسکے۔

اس حوالے سے ہائی وے ٹریفک پولیس کو متعدد شکایات موصول ہوئی تھیں جن پرعمل کرتے ہوئے خلاف ورزیوں کے تدارک کے لیے ساھر سسٹم کو اپ ڈیٹ کیا گیا ہے تاکہ ایسی گاڑیاں جن کے ڈرائیوروں نے نمبر پلیٹ کو چھپایا ہو ان کا خودکار طریقے سے چالان کیا جاسکے۔

واضح رہے مملکت میں ہائی ویز پرحد رفتارجوکہ 120 کلو میٹرفی گھنٹہ تھی کو بڑھا دیا گیا ہے، بعض شاہراہوں پر حد رفتار کو 120 سے بڑھا کر 140 کر دیا گیا ہے جبکہ ایسے ہائی ویز جو زیادہ مصروف رہتے ہیں، وہاں حد رفتار 120 ہی ہے۔

Comments

یہ بھی پڑھیں