ریاض : سعودی عرب کے وژن2030 کے تحت حکام ایک ایسے منصوبے پر کام کر رہے ہیں جس میں رواں سال کے اختتام تک ایک لاکھ افراد کو روزگار دیا جاسکے گا۔
سعودی ذرائع ابلاغ کے مطابق سعودی عرب حکومت کی یہ پیش قدمی ایک بڑے ہدف کی جانب ہے جس کا مقصد سال2030 تک سیاحت کے شعبے میں 10 لاکھ مقامی افراد کو ملازمت فراہم کرنا ہے۔
وزارت سیاحت میں نیشنلائزیشن و ٹریننگ کے جنرل مینیجر بندر السفیر نے میڈیا کو بتایا کہ اس منصوبے کے تحت سعودی شہریوں کو سیاحت کے شعبے میں کام کے لیے تیار کرنے کی پارٹنرشپ پروگرام میں ٹریننگ دی جا رہی ہے۔
السفیر نے بتایا کہ اس وقت ٹرانسپورٹیشن، فوڈ، بیوریجز، انٹرٹینمنٹ اور ٹریول ایجنسی کے کورسز جاری ہیں۔
واضح رہے کہ عالمی وبا کورونا وائرس کے آنے سے کچھ ہی عرصہ قبل سعودی عرب نے ملک میں سیاحت کے فروغ کیلئے دنیا بھر کے سیاحوں کے لیے مملکت کو کھول دیا تھا۔
مملکت میں سیاحت کے شعبے میں بہتری لانے کے لیے کئی بڑے منصوبوں پر کام جاری ہے جن میں بحیرہ احمر کے ساحلی علاقے میں تعمیرات اہمیت کی حامل ہیں۔
