سعودی عرب اور کویت کا اپنے مشترکہ بیان میں کہنا ہے کہ الوفرہ مشترکہ آپریشنز نے تیل کا نیا ذخیرہ دریافت کیا ہے۔
سعودی خبر رساں ادارے کی رپورٹ کے مطابق تیل کا نیا ذخیرہ برقان فیلڈ میں واقع ہے جو الوفرہ فیلڈ کے شمال میں تقریباً 5 کلومیٹر کے فاصلے پر ہے۔
رپورٹس کے مطابق نئے کنویں کی یومیہ پیدوار 500 بیرل سے زیادہ اور کثافت 26 سے 27 اے پی ائی ڈگری ہے۔
یہ دریافت غیر معمولی اہمیت کی حامل ہے کیونکہ اس سے دونوں ممالک کی عالمی توانائی کی فراہمی میں اعتماد، حیثیت اور ان کی تلاش و پیداوار کی صلاحیت میں اضافہ ہوگا۔
یہ دریافت سال 2020 کے وسط میں تقسیم شدہ علاقے اور اس سے ملحقہ آبی علاقے میں پیداواری سرگرمیاں دوبارہ شروع ہونے کے بعد پہلی اہم دریافت ہے۔
واضح رہے کہ گزشتہ ماہ سعودی عرب کے وزیر توانائی شہزادہ عبدالعزیز بن سلمان بن عبدالعزیز کا کہنا تھا کہ سعودی آئل کمپنی ’آرامکو‘ کی ٹیموں نے مشرقی ریجن اور ربع الخالی کے صحرائی علاقے میں تیل اور قدرتی گیس کے مزید 14 ذخائر دریافت کرلئے ہیں۔
رپورٹ کے مطابق وزیر توانائی نے خادم حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز آل سعود کو اس کامیاب دریافت سے متعلق آگاہ کیا اور ساتھ انہیں مبارک باد ارسال کی۔
سعودی شہزادہ عبدالعزیز بن سلمان نے دریافت ہونے والے تیل کے کنوؤں کے حوالے سے مزید بتایا کہ مشرقی ریجن کے کنوئیں ’الجبو 1‘ سے تیل کا اخراج بہت کم یعنی یومیہ 800 بیرل کے مساوی تھا جبکہ صیاھد آئل فیلڈ سے 630 بیرل یومیہ تیل دریافت ہوا۔
ترکیہ کی کمپنی کو پاکستان میں تیل و گیس کی تلاش کیلئے کام کی اجازت مل گئی
سعودی عرب میں ہونے والی مذکورہ دریافتوں کے بعد عیفان آئل فیلڈ کے کنوئیں ’عیفان 2‘ سے یومیہ 2840 بیرل جبکہ وہاں سے یومیہ 0.44 ملین کیوبک فٹ قدرتی گیس حاصل کی جارہی ہے۔
