دمام : سعودی محکمہ زکوٰۃ و ٹیکس اور کسٹم کے عملے نے بیرون ملک جانے والے ایک مسافر کے سامان کی تلاشی لی تو اس کے قبضے سے مشکوک اور پراسرار قسم کا سامان برآمد ہوا۔
سعودی ذرائع ابلاغ کے مطابق محکمہ زکوۃ و ٹیکس و کسٹم نے دمام کے کنگ فہد انٹرنیشنل ایئرپورٹ پر جادوگری اور شعبدے بازی میں استعمال کی جانے والی اشیا کی اسمگلنگ کی کوشش ناکام بنادی۔
سرکاری خبر رساں ایجنسی کی رپورٹ کے مطابق کسٹم انسپکٹر نے شک کی بنیاد پر ایک مسافر کی تلاشی لی جس کے سامان سے جادو گری اور شعبدے بازی میں استعمال کیا جانے والا سامان برآمد ہوا۔ مذکورہ سامان کی نقل و حمل پر پابندی عائد ہے۔
خبر کے مطابق مسافر کے قبضے سے چمڑے کے 5 ٹکڑے برآمد ہوئے جن پر جادو ٹونے کے نام اورعلامتی نمبر لکھے ہوئے تھے۔ چمڑے کے یہ ٹکڑے کھانے پینے کے سامان میں انتہائی مہارت کے ساتھ چھپائے گئے تھے۔
سعودی محکمہ زکوٰۃ و ٹیکس اور کسٹم کے عملے نے مشتبہ مسافر کو فوری طور پر حراست میں لے اور ابتدائی تفتیش کے بعد مزید قانونی کارروائی کے لیے متعلقہ ادارے کے حوالے کردیا گیا۔
