ریاض: سعودی ماہر فلکیات کا کہنا ہے کہ فلکیاتی مطالعے کے مطابق سعودی عرب میں پہلا روزہ 13 اپریل بروز منگل جبکہ عید الفطر 13 مئی کو متوقع ہے۔
سعودی ویب سائٹ کے مطابق ماہر فلکیات ڈاکٹر خالد الزعاق کا کہنا ہے کہ فلکیاتی مطالعے سے کیے جانے والے تجزیے کے مطابق سعودی عرب میں پہلا روزہ 13 اپریل بروز منگل کو متوقع ہے۔
ڈاکٹر خالد کا کہنا ہے کہ امسال 30 روزے اور ماہ رمضان المبارک میں 4 جمعہ ہوں گے جبکہ عید الفطر 13 مئی کو متوقع ہے۔
انہوں نے کہا کہ فلکیاتی مطالعے کے مطابق اتوار کی شام غروب آفتاب کے بعد چاند کی پیدائش کا دور دور تک امکان نہیں، چاند پیر کی شام غروب آفتاب کے بعد دیکھا جا سکے گا۔
فلکیاتی مطالعے اور تجزیے کی رو سے ڈاکٹر خالد نے توقع ظاہر کی ہے کہ پہلا روزہ منگل کے دن ہوگا۔
واضح رہے کہ سعودی عرب میں ہلال کمیٹی کے فیصلے پر چاند کا اعلان کیا جاتا ہے، اس حوالے سے مملکت کے طول و عرض سے موصول ہونے والی شہادتوں کی بنیاد پر کمیٹی چاند دکھائی دینے کا اعلان کرتی ہے۔
