ریاض : سعودی عرب میں تین افراد کی ہلاکت کا واقعہ پیش آیا ہے، معمولی تلخ کلامی کے بعد ملزم نے اپنے دو قریبی رشتہ داروں کو موت کے گھاٹ اتار کر اپنی زندگی کا بھی خاتمہ کرلیا۔
تفصیلات کے مطابق سعودی عرب کے جازان ریجن کی صامطہ کمشنری کے قریے میں رشتہ داروں کے درمیان جھگڑے پر دو افراد جان سے ہاتھ دھو بیٹھے۔
سعودی ذرائع ابلاغ کے مطابق گزشتہ روز چالیس سالہ سعودی شہری نے اپنے چچا زاد بھائی اور داماد کو قتل کرکے خود بھی خود کشی کرلی۔
جازان پولیس نے بتایا کہ قتل اور خودکشی کے یہ دونوں واقعات صامطہ کمشنری کے قریے میں پیش آئے ہیں۔ اطلاع ملتے ہی شواہد جمع کرنے کے لیے جرائم کا سراغ لگانے والی ٹیمیں جائے وقوعہ پہنچ گئیں۔
قتل اور خودکشی کے واقعات انتہائی غصے کے عالم میں ہوئے، قتل کرنے والا بھی رشتہ دار تھا اور خودکشی کرنے والا بھی قریب ترین عزیز تھا۔
سیکیورٹی فورس کے اہلکار قتل کی گتھی کو سلجھانے میں لگے ہوئے ہیں، واردات کے محرکات جاننے کے لیے بڑے پیمانے پر تحقیقات شروع کردی گئی ہے۔
