اسلام آباد: حکومتِ پاکستان نے سعودی عرب سے امداد مانگنے کی بجائے اس کے ساتھ تجارت کرنے کا بڑا فیصلہ کر لیا ہے۔
پاکستان اور سعودی عرب کے باہمی تجارتی تعلقات ایک نئے پڑاؤ کی طرف بڑھتے دکھائی دے رہے ہیں، جہاں برادر ملک کے ساتھ سرمایہ کاری کی بنیاد پر ایک زیادہ مضبوط تعلق استوار کیا جائے گا، ذرائع وزارت خزانہ کے مطابق برادر ملک کی جانب سے 2027 تک ممکنہ طور پر 5 ارب ڈالر سے زائد کی مجموعی سرمایہ کاری ہوگی۔
ذرائع کا کہنا ہے کہ سعودی عرب سے سرمایہ کاری کے لیے تقریباً 30 معاہدوں پر دستخط کیے جائیں گے، اور حکومتی اور نجی شعبے سے تقریباً 40 کمپنیوں کا وفد پاکستان میں سرمایہ کاری کے لیے آئے گا۔
دونوں ممالک کے وفود میں زراعت، انفارمیشن ٹیکنالوجی، کنسٹرکشن مٹیریل، پیٹرولیم، پاور سیکٹر، فوڈ سیکیورٹی، میٹ، پاکستانی رائس ایکسپورٹ کے لیے معاہدوں پر دستخط ہوں گے۔ اور مائننگ، آئل ریفائنری، ریلوے کے لیے طے شدہ معاہدوں کی پیش رفت کا جائزہ لیا جائے گا۔
برادر ملک سے سرمایہ کاری معاہدوں کے لیے فریم ورک تیار کر لیے گئے ہیں، 2027 تک 5 ارب ڈالر سے زائد کی مجموعی سرمایہ کاری ہوگی، ابتدائی طور پر سعودیہ پاکستان میں 2 ارب ڈالر سرمایہ کاری کے معاہدے متوقع ہیں، پہلے مرحلے میں برادر ملک سے نجی شعبے پاکستان میں تقریباً 1 ارب ڈالر کی سرمایہ کاری کریں گے۔
ذرائع کے مطابق نجی شعبہ پاکستان میں اپنے لوکل نمائندے تعینات کر کے سرمایہ کاری کا حجم بڑھائے گا، برادر ملک کی جانب سے پاکستان میں زیادہ سرمایہ کاری نجی شعبہ کرے گا۔
سعودی عرب کا سرکاری وفد سعودی فنڈ فار ڈیولپمنٹ کے تحت منصوبوں پر بھی بات کرے گا، سرکاری ادارے، نجی شعبے کی پاکستان میں الگ الگ حکام سے ملاقاتیں بھی شیڈول ہیں۔ پاکستان میں سرمایہ کاری کے لیے ریگولیٹری کی منظوری، این او سی سے متعلق پیش رفت کا بھی جائزہ لیا جائے گا۔
