سعودی عرب : پیٹرول کی قیمت کے حوالے سے اہم وضاحت

ریاض : سعودی محکمہ زکوٰۃ و آمدنی نے واضح کیا ہے کہ ملک بھر کے پمپنگ اسٹیشنوں میں فروخت ہونے والے پیٹرول کی قیمت میں ویلیو ایڈڈ ٹیکس (واٹ) شامل ہے۔

سعودی ذرائع ابلاغ کے مطابق محکمے کے ٹوئٹر اکاؤنٹ پر ایک شہری نے پوچھا ہے کہ پیٹرول پمپس پر مختلف قسم کے پیٹرول کی متعین قیمت میں ویلیو ایڈڈ ٹیکس (واٹ) شامل ہے یا نہیں؟ نیز صارف کو پیٹرول بھرنے کے بعد جو بل فراہم کیا جاتا ہے اس میں واٹ کی وضاحت کیوں نہیں دی گئی؟

سوال کا جواب دیتے ہوئے محکمہ زکوٰۃ و آمدنی نے واضح کیا ہے کہ تمام پیٹرول پمپس پر فروخت کرنے والے پیٹرول کی قیمت میں ویلیو ایڈڈ ٹیکس (واٹ) شامل ہے اس لیے اس کی الگ سے وضاحت کی ضرورت نہیں۔

پیٹرول پمپس جو بل صارف کو دیتے ہیں اس میں ٹیکس رجسٹری نمبر لکھا ہونا چاہیے جس سے ثابت ہوتا ہے کہ یہ ادارہ محکمے میں رجسٹرڈ ہے اور وہ واٹ ادا کرتا ہے۔

Comments