ریاض: سعودی شہزادہ ترکی بن ناصر بن عبدالعزیز السعود انتقال کر گئے۔
تفصیلات کے مطابق سعودی عرب میں شہزادہ ترکی بن ناصر بن عبدالعزیز السعود 72 سال کی عمر میں انتقال کر گئے، وہ 14 اپریل 1948 کو پیدا ہوئے تھے۔
شاہی عدالت کا کہنا ہے کہ ترکی بن ناصر کی نماز جنازہ آج اتوار کو مملکت کے دارالحکومت ریاض میں ادا کی جائے گی۔
ترکی بن ناصر نے امریکی وار کالج سے پولیٹیکل سائنس میں ماسٹر کی ڈگری حاصل کی تھی، اس کے علاوہ انھوں نے امریکا اور سعودی عرب میں متعدد ملٹری کورسز کیے، اور سعودی عرب میں ایوی ایشن کورسز کے بھی 6 سیشنز میں حصہ لیا۔
شہزادہ ناصر محکمہ موسمیات اور ماحولیات کے سربراہ تھے۔ ایئر فورس چھوڑنے کے بعد شاہ فہد نے ترکی بن ناصر کو موسمیات اور ماحولیات کے شعبے کے سربراہ بنایا، 2000 میں انھیں شہزادہ سلطان کے مشیر خاص کے عہدے پر فائز کیا گیا، اور 2001 میں انھیں ماحولیاتی امور کا وزیر مقرر کیا گیا۔
18 اگست 2013 کو شاہ عبداللہ نے شاہی فرمان کے ذریعے عبد العزیز الجاسر کو پرنس ترکی کی جگہ موسمیات و ماحولیات کے شعبے کا سربراہ بنایا۔
شہزادہ ترکی کو متعدد ایوارڈز اور اعزازات سے بھی نوازا گیا، جن میں آرڈر آف عبدالعزیز آل سعود (فرسٹ کلاس)، کویت لبریشن میڈل، پاکستانی فوجی اعزاز، امریکی میڈل آف رینک، اور فرنچ میڈل آف آنر شامل ہیں۔
