ریاض: سعودی عرب میں کئی مہینوں بعد ایک بار پھر کورونا کے زائد کیسز سامنے آگئے، موجودہ صورت حال نے حکومت کو بھی تشویش میں مبتلا کردیا ہے۔
عرب میڈیا کی رپورٹ کے مطابق سعودی محکمہ صحت کی جانب سے جاری اعدادوشمار میں کہا گیا ہے کہ گزشتہ روز کوروناوائرس کے 1567 نئے کیسز رپورٹ ہوئے اور یہ پریشان کن تعداد کئی مہینوں بعد دیکھی گئی۔ قبل ازیں روزانہ کی بنیاد پر 1 ہزار سے 1200 کے درمیان کیسز سامنے آتے تھے۔
محکمہ صحت نے بتایا کہ گزشتہ روز 15 کورونا مریضوں کی اموات بھی ہوئیں۔ مملکت میں اب تک کورونا سے 4 لاکھ 86 ہزار 106 افراد متاثر ہوچکے ہیں جبکہ مجموعی اموات 7804 ریکارڈ کی گئی۔
سعودی عرب میں گزشتہ روز 1032 افراد نے کورونا کو شکست دی جس کے بعد وبا سے صحت یاب ہونے والوں کی مجموعی تعداد 4 لاکھ 66 ہزار 578 ہوگئی ہے۔
مکہ شہر سے سب سے زیادہ نئے کیسز سامنے آئے جن کی تعداد 403 ہے۔ اسی طرح ریاض اور مشرقی ریجن سے بالترتیب 328 اور 328 کیسز رپورٹ ہوئے۔ عاصر ریجن میں کورونا نے 173 افراد کو اپنے لپیٹ میں لیا۔
سعودی عرب میں فعال کیسز کی تعداد 11724 ہے جن میں سے 1406 کی حالت تشویش ناک ہے۔
