مکہ مکرمہ : سعودی عرب میں جدہ محکمہ ٹریفک نے میونسپلٹی کے حکم پر ساحل سمندر جانے والے راستے سمندری طوفان کے پیش نظر بند کردیے ہیں۔
سعودی ذرائع ابلاغ کے مطابق محکمہ ٹریفک نے ایک بیان میں کہا ہے کہ جدہ سی فرنٹ ٹریفک متبادل راستوں پر موڑ دیا گیا ہے۔
مکہ مکرمہ گورنریٹ نے ٹوئٹر کے اپنے سرکاری اکاؤنٹ پر بیان میں مزید کہا کہ جدہ محکمہ ٹریفک کے اہلکار ساحل سمندر جانے والے راستے بند کرکے متبادل راستوں کی رہنمائی کررہے ہیں۔
محکمہ ٹریفک کے اہلکار گاڑیوں کے ڈرائیوروں کو متنبہ کررہے ہیں کہ سمندر میں طغیانی کے باعث ساحل پر جانا خطرے سے خالی نہیں ہے لہٰذا سمندر جانے والے راستے بند کردیے گئے ہیں۔
محکمہ ٹریفک کی جانب سے مذکورہ راستے استعمال کرنے والے ڈرائیوروں کو متبادل راستے اختیار کرنے کی ہدایت کی جارہی ہے۔
