ریاض : سعودی حکمرانوں کی جانب سے شہریوں کو ہر ممکن سہولیات کی فراہمی کا سلسلہ جاری ہے، اس حوالے سے سعودی فرمانرواں شاہ سلمان بن عبد العزیز نے ایک بڑے منصوبے کی منظوری دے دی۔
سعودی ذرائع ابلاغ کی رپورٹ کے مطابق خادم حرمین شریفین شاہ سلمان بن عبد العزیز نے سعودی شہریوں کو دیے جانے والے ماہانہ الاؤنس پروگرام میں توسیع کی شاہی منظوری دیدی ہے۔
اس حوالے سے سعودی پریس ایجنسی نے رپورٹ کیا ہے کہ شاہ سلمان نے ماہانہ الاؤنس پروگرام میں توسیع ولی عہد شہزادہ محمد بن سلمان کی تجویز پر دی ہے۔
خبر کے مطابق شہریوں کے لیے ماہانہ الاؤنس ستمبر2023تک موجودہ شرائط پر جاری رہے گا جبکہ پروگرام میں نئی رجسٹریشن کی بھی اجازت دی گئی ہے۔
یاد رہے کہ سعودی عرب میں تین برس قبل سعودی شہریوں کے لیے ماہانہ الاؤنس پروگرام جاری کیا گیا تھا جسے عربی میں ’حساب المواطن‘ کا نام دیا گیا۔
گزارا الاؤنس کے تحت جاری پروگرام میں سعودی شہریوں کو بجلی کے بل اور پیٹرول کی قیمتوں میں اضافہ کے بعد خصوصی امدادی الاؤنس جاری کرنے کے لیے شاہی احکامات صادر کیے گئے تھے۔
