ریاض: سعودی عرب میں مخصوص مصالحوں پر پابندی عائد کردی گئی، حکام کے مطابق مصالحوں میں ممنوعہ مواد استعمال کیا جارہا ہے۔
سعودی ویب سائٹ کے مطابق سعودی فوڈ اینڈ ڈرگ اتھارٹی نے مارکیٹ میں موجود 3 قسم کے مصالحوں پر پابندی عائد کردی ہے۔ مصالحوں کو رنگدار بنانے کے لیے اس میں ممنوعہ مواد کے استعمال کا انکشاف ہوا ہے۔
فوڈ اینڈ ڈرگ اتھارٹی کا کہنا ہے کہ مارکیٹ میں موجود ماں برانڈ کی سرخ مرچ اور اس کے مصالحے میں ممنوعہ رنگدار مواد کا استعمال کیا گیا ہے جو انسانی صحت کے لیے مضر اثرات کا حامل ہے۔
علاوہ ازیں عثمانی مصالحے اور پسی ہوئی سرخ مرچ کے علاوہ روض الاصیل برانڈ کے مصالحے پر پابندی عائد کردی گئی ہے۔
اتھارٹی کا کہنا ہے کہ مذکورہ برانڈ کے مصالحوں کو مارکیٹ سے ہٹائے جانے کے احکامات صادر کردیے گئے ہیں، فوڈ اتھارٹی نے صارفین سے بھی کہا ہے کہ وہ مذکورہ مصالحے استعمال نہ کریں، جن کے پاس گھروں میں یہ مصالحے موجود ہیں وہ انہیں تلف کردیں۔
فوڈ اینڈ ڈرگ اتھارٹی نے متعلقہ ادارے کو سفارش کی ہے کہ وہ فوری طور پر مارکیٹوں سے مذکورہ برانڈ کے مصالحوں کو اٹھانے کے احکامات جاری کریں۔
اتھارٹی کی جانب سے اس امر کی بھی یقین دہانی کروائی گئی ہے کہ خلاف ورزی کے مرتکب ذمہ داروں کے خلاف ضروری کارروائی کی جائے گی۔
