ریاض: سعودی عرب نے کم آمدنی والے ملکوں کو کرونا ویکسین کی فرا ہمی کے لیے کوششیں شروع کر دیں۔
تفصیلات کے مطابق سعودی وزیر خزانہ محمد الجدعان نے کہا ہے کہ سعودی عرب کم آمدنی والے ملکوں جیسے یمن اور افریقی ممالک کو کرونا ویکسین کی فراہمی کے لیے ویکسین تیار کرنے والے اداروں سے مذاکرات کر رہا ہے۔
مقامی میڈیا کا کہنا ہے کہ الجدعان نے منگل کو ڈیوس میں ورلڈ اکنامک فورم کے آن لائن اجلاس سے خطاب میں کہا یمن اور بعض افریقی ممالک ’کوفیکس پروگرام‘ کے ذریعے مطلوبہ تعداد میں کرونا ویکسین حاصل نہیں کر سکتے۔
انھوں نے کہا کہ کرونا ویکسین کی خریداری اور تقسیم کے لیے عالمی برادری نے کوفیکس کے نام سے خصوصی طریقہ کار مقرر کیا ہے، جس کی وجہ سے یمن اور افریقی ممالک مطلوبہ تعداد میں ویکسین حاصل نہیں کر پائیں گے۔
وزیر خزانہ نے کہا ہم کئی کمپنیوں سے بات چیت کر رہے ہیں تاکہ خاص طور پر کم آمدنی والے ملکوں کو زیادہ سے زیادہ ویکسین فراہم کی جا سکے۔
خیال رہے کہ سعودی عرب نے 2020 کے دوران جی 20 کے قائد کی حیثیت سے یہ امید دلائی تھی کہ غریب ملکوں کو کرونا وائرس ویکسین مہیا ہو اور اس سلسلے میں مال دار ممالک اپنا کردار ادا کریں۔
واضح رہے کہ سعودی عرب نے کرونا وائرس کے علاج اور ویکسین کے لیے ریسرچ اور تیاری کی مد میں بھاری بجٹ مختص کر رکھا ہے۔
