ریاض : سعودی عرب میں سیاحتی اداروں میں مناسب سہولیات کی عدم فراہمی پر ہوٹلوں اور اپارٹمنٹس کے خلاف قانونی کارروائیاں کی گئی ہیں، مختلف خلاف ورزیوں پر12 ملین ریال سے زائد جرمانے کیے گئے۔
تفصیلات کے مطابق سعودی عرب میں مختلف ممالک سے تفریحی مقامات پر آنے والے سیاحوں کو بہتر سہولیات کی فراہمی کیلئے قومی سیاحتی اتھارٹی نے اہم اقدامات کیے ہیں۔
اس حوالے سے سیاحوں کی رہائش کیلئے مختص ہوٹلوں اور اپارٹمنٹس کا جائزہ لیا گیا اس دوران 18 سو ایسے رہائشی ہوٹلوں اور اپارٹمنٹس کے خلاف تادیبی کارروائیاں کی گئیں۔
جن میں خاطر خواہ سہولیات میسر نہیں تھیں جس پر 12.7 ملین ریال کے جرمانے کیے۔ جن میں فرنشڈ اپارٹمنٹس، ہوٹل اور سیاحتی تفریحی کمپنیاں شامل ہیں۔
اس حوالے سے قومی سیاحتی اتھارٹی کا کہنا ہے کہ تفریحی مقامات پر آنے والے سیاحوں کی سہولت اور ان کے حقوق کے تحفظ کے لیے قواعد مقرر کیے ہیں جن پر عمل کرنا لازمی ہے۔
ان قوانین کی خلاف ورزی پر مذکورہ ہوٹلوں اور دیگر مقامات کیخلاف ایکشن لیا گیا۔ قومی سیاحتی اتھارٹی کے عہدیدار نے بتایا کہ مقررہ قواعد میں رہائشی ہوٹلوں میں منظور شدہ کرایہ نامہ آویزاں کرنے کے علاوہ آنے والے مہمانوں کو بہتر خدمات مہیا کرنا انتظامیہ کی ذمہ داریوں میں شامل ہے۔
