لبنان میں موجود سعودی سفارتخانے کی جانب سے ایک بیان جاری کیا گیا ہے، جس میں سعودی شہریوں سے فوری طور پر لبنان چھوڑنے کی اپیل کی گئی ہے۔
بین الاقوامی خبر رساں ادارے کی رپورٹ کے مطابق سعودی سفارتخانے کی جانب سے جاری بیان میں کہا گیا ہے کہ سفارتخانہ جنوبی لبنان میں بدلتے ہوئے حالات کے حوالے سے گہری نظر رکھے ہوئے ہے۔
رپورٹ کے مطابق لبنان میں موجود سعودی شہری فوری طور پر وطن واپس چلے جائیں، سفارتخانے کا اپنے شہریوں سے کہنا تھا کہ وہ سفر پر پابندی کا احترام کریں۔
سعودی سفارتخانے کا مزید کہنا تھا کہ سعودی شہری محتاط رہیں اور باہر آمد ورفت کے دوران ایسے مقامات سے دوری اختیار کئے رکھیں جہاں مظاہرے یا ہنگامے ہورہے ہوں۔
سفارتخانے نے رابطے کے لیے نمبر بھی جاری کیے ہیں، سفارتخانے نے کسی بھی ہنگامی صورتحال کی صورت میں فوری رابطے کی ہدایت کی ہے۔
دوسری جانب سعودی فرمانروا شاہ سلمان بن عبدالعزیز نے آزاد فلسطینی ریاست کے قیام کو ناگزیر قرار دیتے ہوئے، 1967 کی حد بندی کے مطابق آزاد فلسطینی ریاست کے قیام کا مطالبہ کردیا ہے۔
کابینہ اجلاس سعودی فرمانروا شاہ سلمان بن عبدالعزیز کی زیر صدارت منعقد کیا گیا، جس میں اُن کا کہنا تھا کہ دارالحکومت مشرقی بیت المقدس کے ساتھ آزاد فلسطینی ریاست کا قیام ناگزیر ہے۔
سعودی کابینہ اجلاس میں اسرائیل کی جانب سے فلسطینیوں کی جبری بے دخلی کی بھی شدید مذمت کی گئی جبکہ عرب امن منصوبے کے تحت امن عمل دوبارہ شروع کرنے کا مطالبہ کیا گیا۔
