ریاض: سعودی عرب کی کابینہ نے روس اور امریکا کے درمیان مذاکرات کا خیر مقدم کیا ہے۔
ولئ عہد شہزادہ محمد بن سلمان کی زیر صدارت اجلاس میں کہا گیا ہے کہ امریکا روس مذاکرات کا مقصد دنیا میں سلامتی اور امن کو بڑھانا ہے۔
کابینہ کے ارکان نے کہا کہ مشرق وسطیٰ سمیت دنیا بھر میں امن کی کوششوں کے فروغ میں اپنا کردار ادا کرتے رہیں گے، ارکان نے امید ظاہر کی کہ مذاکرات کی کامیابی سے دنیا میں امن و سلامتی کو فروغ ملے گا، امریکی محکمہ خارجہ نے مذاکرات کے لیے سعودی عرب کے کردار کو سراہا۔
یوکرین جنگ بندی کے لیے سعودی عرب میں روس اور امریکا کے مذاکرات کا پہلا دور مفید قرار دے دیا گیا ہے، فریقین میں بات چیت جاری رکھنے پر اتفاق کیا گیا، امریکی وزیر خارجہ مارکو روبیو نے کہا یہ ملاقات طویل سفر کا پہلا قدم ہے، صدر ٹرمپ تنازع جلد ختم کرنے کے لیے پرعزم ہیں۔
روس امریکا مذاکرات مسترد، یوکرینی صدر نے دورہ ملتوی کر دیا
امریکی محکمہ خارجہ کے مطابق امریکا اور روس مشترکہ کمیٹی بنائیں گے جو یوکرین مذاکرات کے معاملے پر مزید پیش رفت پر کام کرے گی۔ ماسکو اور واشنگٹن میں جو بائیڈن کے دور میں خراب تعلقات اور سفارتی عملے کی بحالی پر بھی اتفاق ہوا۔
امریکی وزیر خارجہ مارکو روبیو نے کہا یوکرین اور یورپ کو سائیڈ لائن نہیں کیا جا رہا، مذاکرات کے اگلے مرحلے میں شامل کیا جائے گا، تنازع کا خاتمہ تمام فریقوں کے لیے قابل قبول ہونا چاہیے۔ روسی وزیر خارجہ سرگئی لاوروف نے کہا یوکرین تنازع حل کرنے اور سفارتی مشن کی رکاوٹیں دور کرنے پر بھی اتفاق ہوا ہے۔
واضح رہے کہ گزشتہ روز امریکا اور روس کے وفد کے درمیان یوکرین تنازع پر ملاقات ریاض میں ہوئی تھی۔ یوکرین کے صدر وولودیمیر زیلنسکی نے سعودی عرب کا دورہ ملتوی کر دیا ہے۔ صدر زیلنسکی کو آج ریاض کا دورہ کرنا تھا۔ غیر ملکی میڈیا کے مطابق یوکرینی صدر 10 مارچ کو سعودی عرب جائیں گے۔
