ریاض: سعودی عرب نے پاکستانی کمیونٹی کی اپنے پیاروں کی مقامی تدفین کے لیے سفری پابندیوں کے دوران این او سی جاری کرنے کے لیے واٹس ایپ سروس متعارف کرادی۔
عرب میڈیا کے مطابق سعودی عرب میں کرونا وائرس پر قابو پانے اور اس کے پھیلاؤ کو روکنے کے لیے احتیاطی تدابیر کے طور پر بعض علاقوں میں محدود کرفیو کا نفاذ کرتے ہوئے مختلف شہروں میں آمدورفت پر پابندی لگائی گئی ہے۔
جدہ میں پاکستانی قونصلیٹ نے پاکستانی کمیونٹی کی سہولت کے لیے سعودی عرب کے مغربی ریجن میں انتقال کرجانے والے افراد کی آخری رسومات کے انتظامات کے لیے واٹس ایپ سروس شروع کی ہے۔
مزید پڑھیں: سعودی عرب کا تارکین وطن کے لیے اہم اقدام
پاکستانی قونصلیٹ نے کمیونٹی سے کہا ہے کہ کرفیو کے اوقات کے دوران کسی عزیز کی تدفین کے لیے اجازت نامہ لے سکتے ہیں، اس کے لیے 0533585184، 0542556778، 0592068461 پر اپنی متعلقہ دستاویز فراہم کرکے این او سی حاصل کرسکتے ہیں۔
واضح رہے کہ سعودی عرب میں حکومت نے کرفیو کے اوقات میں شہریوں اور ملک میں مقیم غیرملکیوں کے باہر نکلنے پر سختی سے پابندی عائد کررکھی ہے۔
یاد رہے کہ سعودی عرب میں کرونا کے 165 نئے مریضوں کی تصدیق ہوئی ہے جس کے بعد مریضوں کی کل تعداد 1885 ہوگئی ہے، وائرس سے 21 افراد جاں بحق اور 64 صحت یاب ہوئے ہیں۔
