سعودی عرب کے شہر تبوک میں جدید اور ماحول دوست الجوھرۃ بنت عبدالعزیز الداود مسجد کا افتتاح کر دیا گیا ہے۔
سعودی میڈیا مطابق تبوک کے علاقے کے علاقے الاسکان میں پہلی اسمارٹ اور ماحول دوست مسجد کا افتتاح کیا گیا ہے۔ اس مسجد کو جدید ٹیکنالوجی اور انیگریٹڈ سروسز کے ساتھ ڈیزائن کیا گیا ہے، جو مسجد کو کمیونٹی کی روزمرہ زندگی کا اہم حصہ بنا دیتی ہے۔
اس حوالے سے انٹیگریٹڈ مساجد کمپنی میں مسجد آپریشنز کے ڈائریکٹر عبدالعزیز الفریج کا کہنا ہے کہ یہ مسجد معاشرے کے تمام افراد بشمول بچوں، خواتین اور معذوروں کو اسپیشل اسمارٹ ٹیکنالوجیز کے ذریعے خدمت فراہم کرتی ہے۔
انہوں نے بتایا کہ یہ مسجد زمین سے صرف 20 سینٹی میٹر اونچی ہے تاکہ بزرگ اور معذور افراد کا بغیر کسی سے مدد لیے مسجد میں داخلہ آسان ہو۔
اس کے علاوہ اس کے مینار کی روشنی اذان کے وقت تبدیل ہوتی ہے تاکہ قوت سماعت اور گویائی سے محروم افراد کو یہ پتہ چل سکے کہ کس وقت کی اذان ہو رہی ہے۔
یہ مسجد مملکت کی سب سے بڑی اسمارٹ مساجد میں سے ایک اور ماحول دوست مسجد ہے۔ اس میں پانی اور بجلی کے استعمال کی فوری مانیٹرنگ اور ریڈنگ کا نظام موجود ہے۔ آپریشنل سسٹم کو کنٹرول کرنے کا نظام بھی ہے تاکہ توانائی کے استعمال کو کم کیا جا سکے۔
انہوں نے مزید بتایا کہ مسجد میں خصوصی سہولتیں موجود ہیں۔ وزارت اسلامی امور کے تعاون سے تمام علاقوں میں اسی طرح کی مساجد تعمیر کرنے کا منصوبہ ہے۔ یہ مساجد قدیم اور جدید اسلامی کردار کو یکجا کرتی ہیں۔
