راولپنڈی : سعودی معاون وزیر دفاع میجر جنرل انجینئر طلال بن عبداللہ العتیبی نے آرمی چیف جنرل سید عاصم منیر سے ملاقات میں دہشت گردی کے خلاف پاک فوج کی کامیابیوں اور قربانیوں کا اعتراف کیا۔
تفصیلات کے مطابق مسلح افواج کے شعبۂ تعلقاتِ عامہ (آئی ایس پی آر) کی جانب سے بیان میں کہا گیا کہ سعودی معاون وزیردفاع میجر جنرل طلال بن عبداللہ العتیبی نے جی ایچ کیو کا دورہ کیا اور آرمی چیف جنرل سید عاصم منیر سے ملاقات کی۔
آئی ایس پی آر کا کہنا ہے کہ ملاقات میں باہمی دلچسپی کے امور، دفاعی پیداوار اور فوجی تربیت سمیت دوطرفہ دفاعی تعاون کو مزید بڑھانے کے اقدامات پر تبادلہ خیال کیا گیا۔
ترجمان نے بتایا آرمی چیف جنرل عاصم منیر نے رائل سعودی لینڈ فورسز کی استعداد کار بڑھانے کیلئے پاک فوج کی حمایت کے عزم کا اعادہ کیا جبکہ میجر جنرل انجینئر طلال بن عبداللہ العتیبی نے دہشت گردی کے خلاف پاک فوج کی کامیابیوں اور قربانیوں کا اعتراف کیا اور علاقائی امن کیلئے پاک فوج کی گرانقدر خدمات کو بھی سراہا۔
میجر جنرل انجینئر طلال بن عبداللہ العتیبی نے پاک سعودی دفاعی تعاون کے پانچویں اجلاس میں بھی شرکت کی، پاک فوج کے چیف آف جنرل اسٹاف کے ہمراہ مشترکہ صدارت کی۔
فورم نے عالمی اور علاقائی سلامتی کودرپیش چیلنجز،افواج پر ان کے اثرات سے متعلق تبادلہ خیال کیا اور دونوں جانب سے جدید ٹیکنالوجی میں تیزی سے ترقی اور دفاعی صنعتی تعاون کی ضرورت پر زور دیا گیا۔۔
اجلاس میں زمینی، فضائی اور سمندری شعبوں میں دفاعی تعاون اور جدید ٹیکنالوجی کے استعمال کو بڑھانے پر اتفاق کیا گیا اور مشترکہ مقاصد کے حصول کے لیے فورم کی طرف سے ٹھوس تجاویز پر غور کیا گیا۔
