سعودی عرب میں موسم کی خرابی کے باعث تعلیم آن لائن ہوگی اور اسکول بند رہیں گے۔
سبق ویب سائٹ کے مطابق سعودی عرب میں محکمہ موسمیات کا کہنا تھا کہ پیر 6 فروری سے آئندہ جمعے تک مملکت کے بیشتر علاقوں میں موسم غیر مستحکم رہے گا، جبکہ تیزہوائیں چلنے اور کا امکان ہے۔
رپورٹ کے مطابق محکمہ موسمیات نے کہا کہ’ پیر سے بدھ تک مکہ مکرمہ، مدینہ منورہ، ریاض، الشرقیہ، قصیم، حائل، الجوف، تبوک، اور حدودشمالیہ ریجن گرد آلود تیزہواوں کی زد میں رہیں گے، تیز ہوا کی رفتار 60 کلو میٹر فی گھنٹہ سے زیادہ ہوگی، آندھی بھی متوقع ہے جبکہ حد نظر انتہائی محدود ہوجائے گی۔
سعودی کی محکمہ موسمیات نے بیان میں کہا کہ مکہ مکرمہ، مدینہ منورہ اور تبوک ریجنوں کے ساحلی مقامات پر منگل سے جمعے تک سمندر میں لہریں ڈھائی میٹر سے زیادہ اونچی ہوں گی۔
بیان میں کہا گیا کہ بدھ سے تبوک، الجوف، حدودشمالیہ، حائل اور شمالی مدینہ منورہ میں شدید سردی کا امکان ہے، ریاض، قصیم اور شمالی مدینہ منورہ میں جمعرات سے درجہ حرارت کم ہوجائے گا۔
محکمہ موسمیات کی ان رپورٹس کو دیکھتے ہوئے سعودی کی محکمہ تعلیم نے تعلیمی اداروں کو بند کرنے کا اعلان کیا ہے۔
دریں اثنا اخبار 24 کے مطابق تبوک، القریات، حائل اور حدود شمالیہ میں محکمہ تعلیم نے کہا ہے کہ’ موسم کی خرابی کے باعث پیر کو بھی تعلیم آن لائن ہی ہوگی اور اسکول بند رہیں گے‘۔
