اسلام آباد : سعودی سفارتخانے نے سعودی ولی عہد اور وزیراعظم شہزادہ محمد بن سلمان کے دورہ پاکستان کی تصدیق کردی۔
تفصیلات کے مطابق اسلام آباد میں سعودی پریس اتاشی نایف العتیبی نے اردو نیوز سے بات کرتے ہوئے سعودی ولی عہد کے دورہ پاکستان کی تصدیق کردی۔
سعودی سفارتخانے نے کہا کہ سعودی ولی عہد اور وزیراعظم شہزادہ محمد بن سلمان پاکستان کے اہم دورے پر اکیس نومبر کو اسلام آباد پہنچ رہے ہیں
ان کا کہنا تھا کہ اس سلسلے میں سعودی سکیورٹی ٹیم اگلے ہفتے پاکستان کا دورہ کرے گی۔
خیال رہے سعودی عرب کے ولی عہد اس سے قبل فروری 2019 میں پاکستان کا دورہ کر چکے ہیں
یاد رہے گذشتہ روز سفارتی ذرائع کا کہنا تھا کہ محمد بن سلمان کا نومبر کے تیسرے ہفتے میں دورہ پاکستان متوقع ہے۔ سعودی ولی عہد کے 21 نومبر کو دورہ پاکستان پر پہنچنے کا امکان ہے۔
دورے سے قبل سعودی سیکیورٹی ٹیم پاکستان پہنچ کر ایم بی ایس کے دورے پر انتظامات کا جائزہ لے گی۔
ذرائع نے بتایا تھا کہ دورے میں پاکستان کو 4.2 ارب ڈالرز کے اضافی بیل آؤٹ پیکج ملنے کی توقع ہے، دورے میں متعدد پاک سعودی پیٹرولیم معاہدوں کو آخری شکل دی جائے گی۔
سعودی عرب کی جانب سےآئل ریفائنری کے قیام پر معاہدہ بھی متوقع ہے، سعودی عرب گوادر میں جدید آئل ریفائنری کے قیام میں مدد کرےگا۔
