ریاض: سعودی عرب میں پہلی بار خواتین نے تربیت مکمل ہونے کے بعد تیز رفتار ٹرین حرمین ایکسپریس چلانا شروع کردی جس کی ویڈیو سوشل میڈیا پر وائرل ہورہی ہے۔
اردو نیوز کے مطابق سعودی عرب میں پہلی مرتبہ خواتین نے حرمین ایکسپریس چلانے کا آغاز کردیا۔
سعودی ریلوے سار نے سعودی خاتون ٹرین ڈرائیور کی ویڈیو اپنے ٹویٹر اکاؤنٹ پر شیئر کی ہے جو سوشل میڈیا پر وائرل ہوگئی۔
32 قائدة سعودية ينطلقن بأقصى سرعة لتحقيق حلمهن الكبير في قيادة أحد أسرع قطارات العالم ليكنّ بذلك أولى دفعات #قائدات_قطار_الحرمين_السريع . pic.twitter.com/zWGA5DbsuT
— الخطوط الحديدية السعودية | SAR (@SARSaudiRailway) January 1, 2023
سار نے تیز رفتار ٹرین چلانے کی ٹریننگ مکمل کرنے والی 24 سعودی خواتین کی ویڈیو شیئر کی ہے۔
ان میں سے ایک خاتون سارۃ الشہری کا کہنا ہے کہ مجھے اور میری ساتھیوں کو مشرق وسطیٰ میں تیز رفتار ترین ٹرین چلانے کا اعزاز سب سے پہلے حاصل ہوا ہے جس پر ہمیں فخر ہے۔
ٹریننگ مکمل کرنے والی ایک اور سعودی خاتون نورۃ ہشام کا کہنا ہے کہ یہ بہت ذمہ داری کا کام ہے، حج، عمرہ اور زیارت پر آنے والوں کی سلامتی حرمین ایکسپریس ڈرائیور کی ذمہ داری ہے۔
انہوں نے کہا کہ حرمین ایکسپریس چلانے کی ٹریننگ دیتے وقت کوشش ہوتی ہے کہ امن و سلامتی کے معیار کی پابندی کی جائے، ٹریننگ دیتے ہوئے ان تمام باتوں کا پورا خیال رکھا جاتا ہے۔
