نیویارک: سعودی عرب کے وزیر خارجہ شہزادہ فیصل بن فرحان نے اقوام متحدہ میں اصلاحات کا مطالبہ کر دیا ہے۔
تفصیلات کے مطابق پیر کے روز شہزادہ فیصل بن فرحان نے یو این فیوچر سمٹ سے خطاب کرتے ہوئے کہا ہے کہ منصفانہ اور زیادہ مساوی عالمی نظام کے قیام کے لیے اقوام متحدہ کے نظام میں اصلاح کی جانی چاہیے۔
انھوں نے کہا کہ فلسطین میں انسانی تباہی پر اسرائیل کو جواب دہ نہ ٹھہرایا جانا عالمی اداروں کی نااہلی ہے، اس تنازعے کو ختم کرنے کے لیے کوئی اقدامات نہیں کیے گئے، بہتر مستقبل کے لیے اقوام متحدہ کے نظام میں اصلاحات ایک فوری ضرورت بن گئی ہیں۔
اقوام متحدہ کے رکن ممالک نے ایک دن قبل ’’مستقبل کے لیے معاہدہ‘‘ کے حق میں ووٹ دیا تھا، اس حوالے سے انھوں نے کہا کہ سعودی عرب نے اس معاہدے پر مذاکرات میں حصہ لینے میں کوئی کسر نہیں چھوڑی، ان شرکا کا شکریہ جنھوں نے حتمی معاہدے کی دستاویز پر شدید بحث کے دوران سعودی عرب کے ساتھ تعاون کیا۔
نیویارک شہر میں اقوام متحدہ کے ہیڈکوارٹر میں اپنے خطاب میں سعودی وزیر خارجہ نے کہا کہ ہم نے یہ اس لیے کیا کیوں کہ ہمیں یقین ہے کہ ہمیں ایک بہتر دنیا، ایک سرسبز دنیا بنانے کے لیے سب کچھ کرنے کی ضرورت ہے۔
