ریاض : سعودی عرب کی اتحادی فورسز نے جازان کی شہری آبادی پر فائر کیا گیا بیلسٹک میزائل فضا میں ہی تباہ کردیا۔
تفصیلات کے مطابق سعودی عرب کی سرحدوں پر مامور عرب اتحادی فورسز نے گذشتہ روز یمنی حوثیوں کی جانب سے داغے گئے بیلسٹک میزائل کو فضا میں ہی تباہ کردیا ہے۔
عرب اتحاد کے ترجمان ترکی المالکی کا کہنا ہے کہ یمن کی آئینی حکومت کے خلاف برسر پیکار حوثی جنگجوؤں نے شام کے اوقات میں یمن کے صوبے صعدہ سے ایک بیلسٹک میزائل داغا تھا جسے سعودی عرب فضائی دفاعی افواج نے فضا میں ہی مار گرایا تھا۔
ترجمان ترکی المالکی کا کہنا تھا کہ ایران نواز حوثیوں کی جانب سے سعودی عرب سرحدی شہر جازان پر میزائل داغا گیا تھا۔
عرب اتحاد کے ترجمان کا کہنا تھا کہ گذشتہ روز فائر کیا جانے والا میزائل دانستہ طور پر آبادی والے علاقے میں داغا گیا تھا تاہم کسی قسم کا کوئی جانی نقصان نہیں ہوا۔
سعودی حکومت نے جازان پر داغے گئے میزائل کی مذمت کرتے ہوئے کہا ہے کہ دانستہ طور پر شہری آبادیوں پر میزائل داغنا اقوام متحدہ کی قرارداد 2231 ور 2216 کی خلاف ورزی ہے۔
ترجمان کے مطابق ایران نواز حوثی ملیشیا کی جانب سے اب تک سعودی عرب پر داغے جانے والے بیلسٹک میزائلوں کی تعداد 195 ہو چکی ہے۔ ان کارروائیوں کے سبب مملکت میں 112 شہری اور مقیم افراد جاں بحق ہوئے جب کہ سیکڑوں افراد زخمی بھی ہوئے۔
ترجمان عرب اتحاد کا کہنا تھا کہ ایران نواز حوثی ملیشیا اوراُن کی پُشت پناہی کرنے والے سزا سے نہیں بچ سکیں گے۔