ریاض : سعودی حکومت نے سیاحت کے فروغ اور تارکین وطن کی سہولت کیلئے بڑا فیصلہ کرتے ہوئے مفت ویزا جاری کرنے کا اعلان کیا ہے، اس سہولت سے کویت، متحدہ عرب امارات اور بحرین میں مقیم تارکین وطن مستفید ہوسکیں گے۔
تفصیلات کے مطابق سعودی عرب کی جانب سے کویت، متحدہ عرب امارات اور بحرین میں مقیم تارکین وطن کے لیے 3 روزہ مفت ویزے جاری کرنے کا اعلان کیا تھا, تارکین وطن چھٹیوں سے فائدہ اٹھا کر سعودی عرب سیاحت کے لیے آسکتے ہیں۔
سعودی حکومت نے تمام متعلقہ اداروں کو ہدایات جاری کر دی ہیں کہ وہ 3 روزہ مفت ویزے جاری کریں۔ اس سلسلے میں سیاحت کے لیے سعودی عرب آنے والوں کو تمام سہولیات مہیا کریں۔
سعودی حکومت کی جانب سے یہ فیصلہ ریاض سیزن کے پروگراموں کے اختتامی مرحلے کو کامیاب بنانے اور مدل بیسٹ ڈیجیٹل میوزک میلے کو کامیابی سے ہمکنار کرنے کے لیے بھی کیا گیا۔ ان پروگرامز میں سیاحوں کو زیادہ سے زیادہ تعداد میں سعودی عرب پہنچنے کی سہولتیں مہیا کی گئی ہیں۔
یاد رہے کہ رواں سال ستمبر میں سعودی عرب نے تیل پر انحصار کم کرنے اور مزید معاشی استحکام حاصل کرنے کے لیے اپنے دروازے بین الاقوامی سیاحوں کے لیے کھولنے کا فیصلہ کیا تھا۔
