اسلام آباد : سعودی ولی عہد شہزادہ محمدبن سلمان کی جانب سے پاکستانیوں کیلئے 150 ٹن کھجوروں کاتحفہ بھجوادیا گیا، ڈی جی کابینہ ڈویژن بریگیڈیئرطاہر رشید نے سعودی تحفہ وصول کیا۔
تفصیلات کے مطابق سعودی حکومت نے رمضان المبارک کی آمد سے قبل پاکستانیوں کیلئے 150 ٹن کھجوروں کا تحفہ بھجوایا ، تحفہ سعودی ولی عہد شہزادہ محمدبن سلمان کی ہدایت پر پاکستانی حکومت کے سپرد کیا گیا۔
سعودی سفیرنواف بن سید المالکی اور ڈائریکٹرکنگ سلمان ریلیف نے پیش کیا اور ڈی جی کابینہ ڈویژن بریگیڈیئر طاہر رشید نے سعودی عرب کا تحفہ وصول کیا۔
یاد رہے چند روز قبل ہی پاکستان کے صدر ڈاکٹرعارف علوی سے سعودی عرب کے سفیرنواف بن سعید المالکی کی ملاقات ہوئی تھی، سعودی سفیر المالکی نے کہا تھا کہ سعودی عرب کی قیادت پاکستان کے ساتھ تعلقات کو بہت اہمیت دیتی ہے اور وہ پاکستان اور اس کے عوام کی حمایت کی خواہش رکھتی ہے، ایک کامیاب اور مستحکم ملک بننے کے لیے اس کے ساتھ کھڑے ہیں۔
گزشتہ برس سعودی سفارت خانے میں منعقدہ تقریب میں سعودی حکومت کی جانب سے پاکستانیوں کے لیے 80 ٹن کھجوروں کا تحفہ دیا گیا تھا۔
خیال رہے سعودی حکومت کی جانب سے ہر سال فوڈ پروگرام منعقد کیا جاتا ہے جس کے تحت اسلامی ممالک میں راشن، کپڑوں اور غذائی تقسیم کی جاتی ہے، جنگ زدہ شام سمیت دیگر ممالک سعودی عوام کی جانب سے گزشتہ برس خطیر رقم بھیجی گئی تھی۔
