سعودی عرب میں سعودی وزارت حج نے مختلف ممالک سے عمرہ ویزے پر آنے والے زائرین کو ایک بار پھر انتباہ دیا ہے کہ ویزے کی مدت ختم ہونے سے قبل اپنے ملکوں کو روانہ ہوجائیں۔
سعودی خبر رساں ادارے کی رپورٹ کے مطابق وزارت حج وعمرہ نے کہا ہے کہ عمرہ ویزے پر غیر قانونی قیام کرنے والوں کو ضوابط کے مطابق سخت سزا بھگتنا پڑے گی۔
سعودی وزارت حج کا کہنا تھا کہ عمرہ ویزے پر آنے والوں کو حج کرنے کی قطعی اجازت نہیں ہوتی۔ زائرین کے لیے یہ ضروری ہے کہ عمرہ ویزے کی مدت ختم ہونے سے قبل ہی اپنے ممالک روانہ ہوجائیں۔
وزارت داخلہ کی جانب سے مملکت میں عمرہ ویزے پر آنے والوں کو ہدایت کی گئی ہے کہ وہ 29 اپریل سے پہلے پہلے اپنے اپنے ممالک روانہ ہوجائیں، مذکورہ تاریخ کے بعد عمرہ ویزے والوں کا مملکت میں قیام غیرقانونی شمار ہوگا جس پر انہیں قانون کے مطابق سزا دی جائے گی۔
واضح رہے حج قوانین کے مطابق عمرہ یا وزٹ ویزے پر آنے والے غیرملکیوں کو کسی طرح بھی حج ادا کرنے کی اجازت نہیں ہوتی ایسا کرنے والے قانون شکنی کے مرتکب ہوتے ہیں جس پر سخت سزا مقرر ہے۔
سعودی عرب: 2 غیر ملکیوں کو سزائے موت
قبل ازیں وزارت نے عمرہ زائرین کی واپسی میں تاخیر پر ایک لاکھ ریال جرمانہ بھی مقرر کیا تھا اور ہدایت کی تھی کہ وہ کمپنیاں جن کے تحت بیرون ممالک سے عمرہ زائرین مملکت آتے ہیں انہیں چاہیے کہ وہ اپنے زیرانتظام مملکت آنے والے زائرین کی وقت مقررہ پر واپسی کو یقینی بنائیں تاکہ بھاری جرمانے سے بچ سکیں۔
