اسلام : سعودی وزیر اطلاعات ڈاکٹرعوادبن صالح پاکستان پہنچ گئے، ڈاکٹرعواد بن صالح وزیراعظم عمران خان کو سعودی فرمانروا شاہ سلمان کا خصوصی پیغام دیں گے۔
تفصیلات کے مطابق سعودی عرب کے وزیر اطلاعات ڈاکٹرعوادبن صالح سرکاری دورے پر پاکستان پہنچ گئے، وفاقی وزیر اطلاعات فوادچوہدری نے اپنے ہم منصب کا استقبال کیا۔
دورے میں سعودی وزیر اطلاعات وزیراعظم عمران خان سے ملاقات کریں گے اور شاہ سلمان کا خصوصی پیغام وزیراعظم کو دیں گے۔
وفد میں سعودی عرب کے سفیرنواف المالکی،سعودی وزیراطلاعات کے مشیر بھی شامل ہیں، دورے کا مقصد دونوں ممالک کے درمیان باہمی تعاون کی نئی راہیں تلاش کرنا ہے۔
سعودی وزیر کو وفاقی وزیراطلات فواد چوہدری نے دورے کی دعوت دی تھی۔
خیال رہے وزیر جارجہ شاہ محمود قریشی کی دعوت پر چینی وزیر خارجہ بھی آج 3 روزہ دورے پر پاکستان پہنچ رہے ہیں، دورے میں وہ شاہ محمود قریشی ، وزیراعظم عمران خان اور آرمی چیف جنرل قمر جاوید باجوہ سے ملاقاتیں کریں گے۔
مزید پڑھیں : سعودی ولی عہد کا عمران خان کو فون، پاکستان میں بھاری سرمایہ کاری کیلئے دلچسپی کا اظہار
یاد رہے سعودی عرب کے ولی عہد محمد بن سلمان نے عمران خان کو ٹیلی فون کر کے انتخابات میں کامیابی پر مبارکباد دیتے ہوئے پاکستان میں بھاری سرمایہ کاری میں دلچسپی کا اظہار کیا تھا اور کہا تھا کہ پاکستان کے ساتھ کاروباری تعلقات مستحکم کرنا چاہتے ہیں،پاکستان میں معاشی، کاروباری امکانات وسیع اور روشن ہیں۔
اس سے قبل سعودی فرماں روا شاہ سلمان بن عبدالعزیز نے عمران خان سے رابطہ کرکے سعودی عرب کے دورے کی دعوت دی جسے عمران خان نے قبول کرلی تھی۔
سعودی فرماں روا نے نئی حکومت کے لیے نیک تمناؤں کا اظہار کرتے ہوئے کہا تھا کہ پاکستان سعودی عرب کی نظر میں نہایت اہمیت کا حامل ہے، پاکستان کے عوام نے آپ پر اعتماد کا اظہار کیا ہے، سعودی عرب نئی حکومت کے ساتھ قریبی تعلقات کا خواہاں ہے۔
