واشنگٹن: وزیر خزانہ محمد اورنگزیب نے سعودی فنڈ برائے ترقی کے سی ای او سے ملاقات میں درخواست کی ہے کہ سعودی آئل سہولت کے تحت واجب الادا رقوم کی فوری ادائیگی کی جائے۔
تفصیلات کے مطابق وفاقی وزیر برائے خزانہ و محصولات سینیٹر محمد اورنگزیب نے آئی ایم ایف-ورلڈ بینک اسپرنگ میٹنگز 2025 کے موقع پر سعودی فنڈ برائے ترقی (SFD) کے چیف ایگزیکٹو آفیسر سلطان بن عبدالرحمان المرشد سے ملاقات کی۔
انھوں نے پاکستان میں سرمایہ کاری کے منصوبوں میں سرکاری سطح (G2G) اور نجی سطح (B2B) پر بڑھتی ہوئی دل چسپی کو سراہا۔ وزیر خزانہ نے سعودی آئل سہولت کے تحت واجب الادا رقوم کی فوری ادائیگی کی درخواست کی اور اس ضمن میں تیل کی ترسیل کے شواہد فراہم کرنے کی یقین دہانی کروائی۔
آئی ایم ایف نے پاکستان میں سول سروس تقرریوں میں سیاسی مداخلت کی نشان دہی کر دی
وزیر خزانہ نے فروری 2025 میں سعودی عرب کے دورے اور العُلا میں منعقدہ ابھرتی ہوئی معیشتوں کی کانفرنس میں شرکت کے علاوہ سعودی وزیر خزانہ سے ہونے والی ملاقات کا حوالہ دیا۔
دونوں فریقون نے موجودہ منصوبہ جات کا جائزہ لیا اور وزیر خزانہ نے ان کی پیش رفت پر اطمینان کا اظہار کیا۔ انھوں نے SFD سے این-25 منصوبے کے لیے مالی معاونت کی درخواست بھی کی۔
