سعودی محکمہ پاسپورٹ اینڈ امیگریشن کی جانب سے غیر ملکیوں کے لئے اہم وضاحت جاری کی گئی ہے، جس میں کہا گیا ہے کہ غیرملکیوں کے خروج وعودہ اور خروج نہائی ویزوں کو استعمال نہ کرنے کی صورت میں انہیں منسوخ کرنے کی سہولت ابشر پلیٹ فارم پر موجود ہے۔
بین الاقوامی خبر رساں ادارے کی رپورٹ میں بتایا گیا ہے کہ سعودی محکمہ پاسپورٹ اینڈ امیگریشن جوازات نے ’ایکس‘ اکاؤنٹ پرغیرملکیوں کے اہل خانہ اور گھریلو کارکنوں کے ایگزٹ ری انٹری اورفائنل ایگزٹ ویزے کی منسوخی کے حوالے سے وضاحت جاری کی ہے۔
جس میں واضح طور پر کہا گیا ہے کہ ویزے کو استعمال نہ کرنے کی صورت میں اسے 90 روز کی مدت ختم ہونے سے قبل ابشر اکاؤنٹ سے منسوخ کرایا جاسکتا ہے، بصورت دیگر مقررہ مدت ختم ہونے پر جرمانہ عائد کیا جائے گا۔
گھریلو کارکنوں نے اگر ایگزٹ ری انٹری یا فائنل ایگزٹ کو استعمال نہیں کیا ہوگا تو انہیں اسے منسوخ کرانے کے لیے ابشر یا مقیم پلیٹ فارم پر موجود ’خدمات العمالہ‘ کے براؤز میں جانا ہوگا جس کے بعد ’الخدمات‘ کو کھولنا ہوگا جہاں ’التاشیرات‘ کا آپشن موجود ہو گا جسے کلک کرنے پرویزے کو کینسل کرنے کا آپشن سامنے آجائے گا۔
ایگزٹ ری انٹری یا فائنل ایگزٹ ویزے وقت مقررہ پر اگر منسوخ نہیں کرائے جاتے تو ایک ہزار ریال جرمانہ عائد کیا جاتا ہے جس کی ادائیگی کے بعد ہی جوازات میں غیرملکی کی فائل کو کھولا جاسکتا ہے۔
واضح رہے کہ ایسے ایگزٹ ری انٹری ویزے جن میں واپسی کی تاریخ کا تعین کیا جاتا ہے ان کے لیے منسوخی کا وقت واپسی کی تاریخ سے قبل تک ہوتا ہے کیونکہ ایسے ویزے دنوں کے حساب سے جاری ہوتے ہیں۔
